Buharestden goşa medal: Lebaply pälwanlaryň uly ýeňşi

Rumyniýanyň Buharest şäherinde 17 ýaşa çenli türgenleriň arasynda geçirilen «Konstantin Aleksandru we Ioan Popowiçi» adyndaky abraýly halkara ýaryşy türkmen sportunyň täze üstünliklerine beslendi. Türkmenistanyň ýygyndy toparynyň düzüminde çykyş eden Lebap welaýatynyň ýaş pälwanlary Watanymyza altyn we kümüş medallar bilen dolandylar. Ýaryşyň dowamynda pälwanlarymyz özleriniň ussatlygyny we ýeňşe bolan erjelligini görkezdiler: - Rejep Joraýew (Altyn medal): Grek-rim göreşi boýunça 51 kg agram derejesinde çykyş eden Türkmenabat şäherindäki 29-njy orta mekdebiň okuwçysy ähli garşydaşlaryny yzda galdyryp, hormat münberiniň iň ýokary basgançagyna göterildi. - Mekan Hudaýberenow (Kümüş medal): Erkin göreş boýunça 71 kg agram derejesinde Türkmenabat şäherindäki 38-nji orta mekdebiň okuwçysy şowly çykyş edip, ýaryşyň kümüş medalyna mynasyp boldy. Bu halkara ýaryşy özüniň gerimi we gatnaşyjylarynyň sany bilen tapawutlandy. Erkin göreş boýunça dünýäniň 16 döwletinden 114 türgen, grek-rim göreşi boýunça bolsa 74 pälwan güýç synanyşdy. Şeýle güýçli bäsdeşleriň arasynda lebaply ýaşlaryň baýrakly orunlary eýelemegi, türkmen sport mekdebiniň ýokary derejesiniň nobatdaky subutnamasydyr.