Jemgyýet
Türkmenistanyň Ýaponiýadaky Ilçisi Türkmen-ýapon ylmy- tehnologik assosiasiýasynyň Prezidenti bilen duşuşyk geçirdi
February 12, 2026 17:23 • UTC+5 (Ashgabat) • 45 views
Türkmenistanyň Ýaponiýadaky Ilçisi A.Baýramow Türkmen-ýapon ylmy-tehnologik assosiasiýasynyň Prezidenti H.Koýnuma we ýapon kompaniýalarynyň wekilleri bilen duşuşdy. Duşuşykda suw arassalaýyş we ýerasty baýlyklary gözlemek boýunça tehnologiýalar hem-de täze hyzmatdaşlyk mümkinçilikleri ara alnyp maslahatlaşyldy.
2026-njy ýylyň 9-njy fewralynda Türkmenistanyň Ýaponiýadaky Ilçisi A.Baýramow Türkmen-ýapon ylmy-tehnologik assosiasiýasynyň Prezidenti H.Koýnuma hem-de bu assosiasiýa bilen bilelikde iş alyp barýan ýapon kompaniýalarynyň wekilleri bilen duşuşyk geçirdi. Bu barada Türkmenistanyň DIM-niň web-saýtynda habar berilýär.
Duşuşykda Türkmenistan bilen Ýaponiýanyň arasynda ozaldan ýola goýlan ylmy-tehnologik hyzmatdaşlygy has-da pugtalandyrmak we bu ugurda türkmen bazaryna mümkin bolan täze ýapon kompaniýalaryny tanyşdyrmak meseleleri ara alyp maslahatlaşyldy.
Duşuşygyň dowamynda suw arassalaýyş tehnologiýalaryny hem-de enjamlaryny ornaşdyrmak boýunça ýurdumyzda degişli işleri alyp barmagy meýilleşdirýän «Tohkemy Corporation» ýapon kompaniýasynyň mümkinçilikleri, tehnologik teklipleri barada pikir alşyldy.
Mundan başga-da, duşuşykda ýerasty baýlyklary gözlemekde kwant duýujylygyny ulanýan ýokary takyklykly anyklaýyş tehnologik enjamlary öndürmäge, suwuklandyrylan gaz babatda kömürturşy gazyny bölüp aýyrmak tehnologiýa ýöriteleşen «Sustec», «Carbon Cryo Capture Co., Ltd» ýapon kompaniýalarynyň mümkinçilikleri bilen tanyşdyryldy.