Türkmenistanyň ýaş agyr atletikaçylary dünýä çempionatynda güýç synanyşarlar

Müsür Arabystan Respublikasynyň Ismailia şäherinde agyr atletika boýunça ýaşlaryň arasyndaky dünýä çempionaty-2026 badalga aldy. Bu abraýly ýaryşda Türkmenistanyň milli ýygyndysyna wekilçilik etjek türgenleriň düzümi mälim edildi. Halkara agyr atletika federasiýasynyň (IWF) habar bermegine görä, Türkmenistandan jemi dokuz türgen (bäş gyz we dört ýigit) sport toplumynda geçiriljek ýaryşlarda ýurdumyzyň sport abraýyny gorarlar. Milli ýygyndymyzyň düzümi: Zenanlaryň arasyndaky ýaryşlarda altyn medallar ugrunda şu türgenlerimiz çykyş ederler: - Ogulşat Amanowa we Şabnam Kerimbaýewa (53 kg çenli agram); - Medine Amanowa (63 kg çenli agram); - Asal Kerimbaýewa (77 kg çenli agram); - Anamjan Rustamowa (86 kg çenli agram). Milli ýygyndymyzyň erkekler toparynda bolsa dört türgenimiz pälwanlyk ukybyny görkezer: - Didarbek Jumabaýew (79 kg çenli agram); - Yslam Akmyradow (94 kg çenli agram); - Süleýman Jafarow (110 kg çenli agram); - Saparbaý Atajanow (110 kg-dan ýokary agram). Ýatlap geçsek, geçen ýyl Peru döwletiniň Lima şäherinde geçirilen dünýä çempionatynda türkmen ýygyndysy umumy hasapda 14-nji orny eýeläpdi. Şonda toparymyzyň esasy üstünligini 87 kg agramda çykyş eden Anamjan Rustamowa gazanypdy. Ol silterläp götermekde (141 kg) we iki görnüşiň jemi boýunça (249 kg) iki sany altyn medala mynasyp bolupdy. Şu gezekki dünýä birinjiliginde hem türkmen pälwanlaryndan ýokary netijelere we täze üstünlikler garaşylýar.