Göwrelilik we wiruslar: Lukman maslahaty

Eger göwrelilik döwründe geçirilen ganyň barlagynda wiruslaryň bardygy anyklanylsa, onda wirus göwredäki çaga howp salýarmy? Ganyň barlagynda wirusyň anyklanmagy, elbetde, alada döredip biler, ýöne bu ene bolmak mümkinçiligiňiziň ýokdugyny aňlatmaýar. Häzirki zaman lukmançylygy enede wirus ýokançlary bar bolanda-da sagdyn çaganyň dogulmagyna mümkinçilik berýär. Şunda haýsy wirus barada gürrüň gidýändigini bilmek örän möhümdir. Wiruslaryň görnüşleri we olaryň täsiriWiruslaryň göwrelilik döwründe çaga edýän täsiri biri-birinden düýpli tapawutlanýar: - Wirusa garşy bejergi: Häzirki wagtda ýörite bejergi almak bilen wirusyň gandaky mukdaryny peseldip ýa-da ýok edip, çaganyň saglygyny gorap bolýar. - Gepatit B we C: Bu wiruslar bar bolanda hem göwreli bolmak mümkindir. Lukmanyň görkezmesi esasynda çaga geçmeginiň öňüni alýan ýörite bejergi bellenilýär. - Sitomegalowirus we gerpes: Bu wiruslar göwrelilik döwründe dörän bolsa howply bolup biler. Ýöne bedende olara garşy öňden immunitet (antitela) bar bolsa, olar göwredäki çaga howp salmaýar. Göwrelilik meýilleşdirilende esasy maslahatlarEger-de siz göwreli bolmagy meýilleşdirýän bolsaňyz, şu ädimleri ätmeli: - Barlagdan geçmek: Ýan ýoldaşyňyz bilen bilelikde anyklaýyş barlagyndan geçmeli. Lukman wirusyň görnüşini we işjeňligini anyklamaly. - Hünärmen maslahaty: Ginekolog we ýokanç keselleri lukmanynyň (infeksionist) maslahatyny almaly. - Özbaşdak bejergiden gaça durmak: Özbaşyňa derman kabul etmek saglygyňyza zyýan ýetirip biler. Bejergi diňe barlag netijelerine esaslanyp, lukman tarapyndan bellenilmelidir. - Immun ulgamyny güýçlendirmek: Stresden gaça durmaly. Ýoga, meditasiýa we arassa howada gezelemeler bedeniň garşylygyňy artdyrýar. - Foliý turşusy: Göwrelilikden 3 aý öňünden foliý turşusyny kabul etmek maslahat berilýär. Bu çaganyň nerw ulgamynyň sagdyn kemala gelmegi üçin möhümdir. Netije: Göwrelilikden ozal wirusyň bardygy anyklanan bolsa, wagtynda bejergi alyp, wirusyň mukdaryny peseltmek we sagdyn nesli dünýä indirmek doly mümkindir. Myrat Garryýew adyndaky TDLU-nyň hünärmenleriniň resmi maslahatlary esasynda taýýarlandy.