Bilim
Magtymguly adyndaky TDU-nyň talyby Durdygylyç Ýarjanow «GDA-nyň iň gowy talyby» boldy
January 9, 2026 10:27 • UTC+5 (Ashgabat) • 19 views
Magtymguly adyndaky TDU-nyň žurnalistika talyby Durdygylyç Ýarjanow GDA-nyň iň gowy talyby baýragyna mynasyp boldy. Ol I derejeli Diploma, nyşan we kuboga eýe boldy, bu üstünlik türkmen talyplarynyň mümkinçilikleriniň halkara derejesinde tanalmagynyň mysalydyr.
Golaýda Magtymguly adyndaky Türkmen döwlet uniwersitetiniň žurnalistika hünäriniň 3-nji ýyl talyby Durdygylyç Ýarjanow Gazagystan Respublikasynyň Astana şäherinde geçirilen «GDA-nyň iň gowy talyby» atly halkara bäsleşigine internet arkaly gatnaşyp, I derejeli Diploma, döşe dakylýan nyşana we kuboga mynasyp boldy.
Gazagystan Respublikasynyň «Bilim Orkenieti» milli innowasiýa ylmy-gözleg merkezi hem-de «Žana Gazagystan» respublikan innowasion merkezi tarapyndan guralan bu halkara bäsleşigiň eminler topary Durdygylyç Ýarjanowyň ylma, sungata we döredijilige goşan goşantlaryny ýokary bahalandyrdylar.
Abraýly bäsleşikde ýeňiji bolan talyplaryň netijeleriniň «GDA-nyň iň gowy talyby» diýen halkara kitap ýygyndysyna girilizjekdigini bellemek gerek.
Şunlukda, halkara bäsleşikde gazanylan ýeňiş Durdygylyç Ýarjanowy GDA-nyň iň gowy talyplarynyň hataryna goşdy.
Ajaýyp netije türkmen talyplarynyň bilimlerini, mümkinçiliklerini hem zehinlerini halkara derejesinde görkezmekleri ugrunda döredilýän giň mümkinçilikleriň miwesidir.