Türkmenistanyň Ilçisi Ýewropa Parlamentinde brifing geçirdi

Türkmenistanyň Belgiýadaky Ilçisi Sapar Palwanow Brýusselde Ýewropa Parlamentiniň Merkezi Aziýa we Mongoliýa bilen gatnaşyklar boýunça wekiliýetiniň gatnaşmagynda Ýewropa Parlamentiniň agzalary üçin brifing geçirdi. Duşuşyga wekiliýetiň ýolbaşçysy, Ýewropa Parlamentiniň agzasy Juzeppina Prinçi ýolbaşçylyk etdi. Bu barada Türkmenistanyň Belgiýadaky Ilçihanasy sişenbe güni habar berdi. Brifingiň dowamynda Türkmenistan bilen Ýewropa Bileleşiginiň arasyndaky hyzmatdaşlygyň şertnama-hukuk binýadyny pugtalandyrmagyň we döwrebaplaşdyrmagyň zerurlygy nygtaldy. ÝB bilen Merkezi Aziýanyň arasynda strategik derejede hyzmatdaşlygy ösdürmegiň sebitdäki her bir ýurt bilen has gurluşly dialogy talap edýändigi bellenildi. Şeýle hem taraplar ýokary derejedäki yzygiderli aragatnaşyklaryň we edaralaryň arasyndaky yzygiderli hyzmatdaşlygyň möhümdigine aýratyn üns çekdiler. Mundan başga-da türkmen ilçisi 5-nji martda Brýusselde Türkmenistanyň Mejlisiniň agzalarynyň gatnaşmagynda geçiriljek parlamentara dialog barada habar berdi. Duşuşygyň dowamynda ykdysady hyzmatdaşlykdan we ulag baglanyşygynyň ösdürilmeginden başlap, ynsanperwer ugur we parlament gatnaşyklarynyň ösdürilmegine çenli hyzmatdaşlygyň häzirki zaman meseleleriniň giň toplumy ara alnyp maslahatlaşylmagy meýilleşdirilýär. Sapar Palwanow Türkmenistan bilen Ýewropa Bileleşiginiň arasynda ykdysadyýet, howanyň üýtgemegi boýunça gün tertibi, durnukly ösüş we ynsanperwer dialog ugurlarynda hyzmatdaşlygyň uly mümkinçilikleriniň bardygyny belläp, ählumumy kynçylykly şertlerinde hyzmatdaşlygy çuňlaşdyrmagyň möhümdigini nygtady. Geçirilen brifing Türkmenistanyň Ýewropa Parlamenti bilen konstruktiw dialoga ygrarlydygyny hem-de özara hormat goýmak we umumy bähbitler esasynda Ýewropa Bileleşigi bilen hyzmatdaşlygy mundan beýläk-de ösdürmäge gönükdirilendigini tassyklady.