Jemgyýet
Göwher Guwerne-Pirkuliýewa Er-Riýadda fransuz dizaýneri bilen bilelikdäki işini tanyşdyrdy
February 6, 2026 18:43 • UTC+5 (Ashgabat) • 25 views
Türkmen dizaýneri Göwher Guwerne-Pirkuliýewa Saud Arabystanynyň Er-Riýad şäherinde fransuz dizaýneri Klod Patrik bilen bilelikde traýýarlan lybaslar toplumyny tanyşdyrdy. Lybaslarda türkmen dokma mirasynyň elementleri bilen dünýä modasynyň häzirki zaman tendensiýalary utgaşdyryldy. Çäräniň maksady dürli ýurtlaryň dizaýnerleri arasynda medeni dialogy ösdürmekdir.
Türkmen dizaýneri Göwher Guwerne-Pirkuliýewa Saud Arabystany Patyşalygynyň Er-Riýad şäherinde 4–8-nji fewral aralygynda geçirilýän “Oriental Fashion Show” çäresiniň çäklerinde fransuz dizaýneri Klod Patrik bilen bilelikde taýýarlan lybaslar toplumyny tanyşdyrdy. Bu barada çäräniň resmi sosial ulgamlarynda habar berilýär.
Bilelikde taýýarlanylan lybaslar toplumy türkmenleriň däp bolan dokma mirasynyň elementlerini ýewropa modasynyň häzirki zaman çemeleşmeleri bilen utgaşdyryldy. Moda görkezilişi dürli ýurtlaryň we medeniýetleriň dizaýnerleriniň arasynda dialogy ösdürmäge gönükdirilen “Oriental Fashion Show” çäresiniň halkara maksatnamasynyň bir bölegi boldy.
Göwher Guwerne-Pirkuliýewa milli äheňleriň häzirki zaman estetikasyna sazlaşykly utgaşdyrylýan işleri bilen tanalýar. Dizaýneriň hünär tejribesi Parižde we Sankt-Peterburgda okamak we işlemek, şeýle hem halkara taslamalara gatnaşmak ýaly ugurlary öz içine alýar.
Fransuz dizaýneri Klod Patrik hyzmatdaşlygyň çäklerinde ýönekeý şekillere we döwrebap siluetlere aýratyn üns berdi. Bu bolsa dizaýnerlere sazlaşykly lybaslar toplumyny döretmäge giň mümkinçilik berdi.
“Oriental Fashion Show” 2004-nji ýylda esaslandyrylan we 50 ýurtdan ýüzden gowrak dizaýneri tanadan halkara çäresi bolup durýar. Häzirki wagtda bu çäre moda ulgamynda medeniýetleriň arasynda dialogy ösdürmegi yzygiderli dowam etdirýär.