Daşoguzda täze jaýlara gaz çekmek işleri alnyp barylýar

Häzirki wagtda Daşoguz welaýatynda gurluşyk işleri dowam edýän täze ýerlere gaz çekmek we ýerli sarp edijileri gaz bilen üznüksiz üpjün etmek boýunça işler alnyp barylýar. Habarda bellenilişi ýaly, «Türkmengazüpjünçilik» birleşiginiň sebitinde ýerleşýän gurluşyk-gurnama bölüminiň hünärmenleri eýýäm şu ýylyň başyndan bäri oba we şäher ýerlerindäki täze jaýlara tebigy gaz geçirmek boýunça toplumlaýyn çäreleri işjeň durmuşa geçirýärler. Olaryň şu günler gurýan desgalarynyň arasynda Görogly etrabynyň Zaman geňeşligindäki orta basyşly täze gaz geçirijisi-de bar. Häzirki güne çenli umumy uzynlygy iki kilometr alty ýüz metr bolan täze geçirijiniň, takmynan, iki kilometri çekildi. Bu topar, şeýle hem Gubadag etrabynyň Amyderýa geňeşliginde uzynlygy üç kilometrden gowrak bolan täze gaz geçirijisini çekýär. Olar Daşoguzyň eteginde infrastrukturany ösdürmek işlerini-de alyp barýarlar, bu ýerde täze gaz geçirijisiniň umumy uzynlygy 440 metr bolar. Bellenilişi ýaly, diňe şu topar bir ýylyň dowamynda welaýatda onlarça kilometr täze gaz ulgamlaryny gurar.