Dünýä
Aşgabatda “Nebit we Gaz – Türkmenistan 2025” forumy geçiriler
September 25, 2025 15:57 • UTC+5 (Ashgabat) • 28 views
Oktýabr aýynyň 22-24-i aralygynda paýtagtymyz Aşgabat şäherinde “Nebit we Gaz Türkmenistan – 2025” atly 30-njy halkara maslahaty we sergisi geçiriler. Türkmenistanyň MMI habar bermegine görä, foruma 45 ýurtdan 500-den gowrak wekiliň gatnaşmagyna garaşylýar.
Bu ýylky forum täze gatnaşyjylaryň sany boýunça rekord derejä çykyp biler — 100-den gowrak täze delegat we 30-dan köp daşary ýurt kompaniýasy ilkinji gezek türkmen bazaryna çykmagy meýilleşdirýär. Ilkinji gezek ýa-da uzak arakesmeden soň gatnaşjak ýurtlaryň arasynda Hytaý, Beýik Britaniýa, ABŞ, Gazagystan, Germaniýa, Russiýa we BAE bar.
Forumyň çäginde ilkinji gezek ýörite B2B duşuşyk meýdançasy dörediler. Bu ýerde türkmen we daşary ýurt işewürleri göni gepleşikler alyp barar. Şeýle hem gatnaşyjylar üçin TEF App mobil goşundysy elýeterli bolar, onuň üsti bilen forumyň tertibi we gatnaşyjylar hakynda maglumat almak bolar.
OGT 2025 energetika ulgamynda täze şertnamalaryň baglaşylmagyna, tejribe alyşmalaryna we halkara hyzmatdaşlygyň ösdürilmegine mümkinçilik berjek möhüm iş meýdançasy bolar.