Geljegiň alymlary: Tebigy we takyk ylymlar boýunça bäsleşikde uly üstünlik

Seýitnazar Seýdi adyndaky Türkmen döwlet mugallymçylyk instituty tarapyndan tebigy we takyk dersler boýunça geçirilen bäsleşikde Lebap welaýatynyň okuwçylary uly üstünlik gazandylar. Ýurdumyzyň ähli künjeginden 1500-den gowrak okuwçynyň gatnaşan bu bäsleşiginde welaýatymyzyň zehinli ýaşlary birnäçe dersler boýunça birinji orunlary eýelemegi başardylar. Bäsleşigiň netijeleri boýunça dersler we mekdepler kesgitlenip, aşakdaky okuwçylar iň ýokary netijeleri görkezdiler: - Matematika: Kerim Berdiýew (Türkmenabat ş., 41-nji ýöriteleşdirilen orta mekdep); - Informatika: Oraz Begenjow (Türkmenabat ş., 39-njy ýöriteleşdirilen orta mekdep); - Himiýa: Altyn Nurmatjanowa we Güneş Ramanowa (Farap etraby, 1-nji orta mekdep); - Biologiýa: Nurjahan Gafurjanowa (Farap etraby, 21-nji orta mekdep); - Geografiýa: Jeýran Rahmedowa (Hojambaz etraby, 10-njy orta mekdep) we Aýgül Toýlyýewa (Garabekewül etraby, 1-nji orta mekdep); - Ekologiýa: Şatlyk Ylhamow (Köýtendag etraby, 19-njy orta mekdep), Malika Hamraýewa (Türkmenabat ş., 30-njy orta mekdep) we Şöhrat Ýangibaýew (Türkmenabat ş., 28-nji ýöriteleşdirilen orta mekdep). Bäsleşikde orta mekdepleriň 10-12-nji synp okuwçylary tebigy we takyk ylymlar boýunça bilim we ukyplaryny özara synaşdylar. Çäräniň esasy maksady ýaş nesliň ylma bolan höwesini artdyrmakdan we geljegiň hünärmenlerini ýüze çykarmakdan ybaratdyr. Dänew etrabynyň 11-nji orta mekdebiniň mugallymy Nezire Kazakowanyň bellemegine görä, bu üstünlikler welaýatymyzyň bilim ulgamynda gazanylýan netijeleriň we ýaşlaryň ylma bolan höwesiniň aýdyň subutnamasydyr.