Syýasat
Aşgabatda GDA-nyň Hökümet Baştutanlarynyň sammitine taýýarlyk görülýär
March 27, 2026 08:07 • UTC+5 (Ashgabat) • 41 views
Aşgabatda 2026-njy ýylyň 22-nji maýynda geçiriljek GDA-nyň Hökümet Baştutanlarynyň sammitine taýýarlyk işleri dowam edýär. Duşuşykda guramaçylyk we gün tertibi meseleleri ara alnyp maslahatlaşyldy. Türkmenistan başlyklyk edýän döwlet hökmünde ýokary derejede geçirilmegini üpjün edýär.
Düýn Türkmenistanyň daşary işler ministriniň orunbasary S.Muhammetdurdyýewiň Garaşsyz Döwletleriň Arkalaşygynyň (GDA) Ýerine ýetiriji komitetiniň wekiliýeti bilen duşuşygy geçirildi. Duşuşygyň dowamynda 2026-njy ýylyň 22-nji maýynda Aşgabatda geçirilmegi meýilleşdirilýän GDA-nyň Hökümet Baştutanlarynyň Geňeşiniň mejlisine taýýarlyk görmek bilen bagly meseleler ara alnyp maslahatlaşyldy diýip, Türkmenistanyň DIM-iniň metbugat gullugy habar berdi.
Duşuşygyň dowamynda türkmen tarapy öňde boljak mejlise aýratyn ähmiýet berýändigini belläp, oňa Arkalaşygyň çäklerinde köptaraplaýyn hyzmatdaşlygy mundan beýläk-de berkitmek üçin möhüm meýdança hökmünde garalýandygyny aýtdy.
Taraplar GDA-nyň Hökümet Baştutanlarynyň Geňeşiniň mejlisine taýýarlyk meselelerini ylalaşmak hakynda Teswirnamanyň taslamasynyň çäklerinde gün tertibine degişli meseleleri, şeýle hem öňde boljak mejlisi taýýarlamagyň guramaçylyk-protokol taraplaryny jikme-jik ara alyp maslahatlaşdylar.
Bellenilişi ýaly, 2026-njy ýylda GDA-da başlyklyk edýän döwlet hökmünde Türkmenistan mejlisiň ýokary derejede guralmagyny we üstünlikli geçirilmegini üpjün etmek üçin ähli zerur çäreleri görýär.