Koreýa Respublikasynyň Türkmenistandaky ilçihanasy akademiýanyň magistratura we doktorantura maksatnamalaryna kabul edişligi yglan etdi

Koreýa Respublikasynyň Türkmenistandaky ilçihanasy Koreýany öwreniş akademiýasynyň ýokary mekdebine okuwa girmek üçin dalaşgärleriň kabul edilýändigini yglan etdi. Maksatnama Günorta Koreýanyň öňdebaryjy bilim merkezleriniň birinde magistr ýa-da doktor derejesini almaga mümkinçilik berýär. Resminamalaryň kabul edilişi 2026-njy ýylyň güýz we 2027-nji ýylyň ýaz okuw möwsümi üçin açyldy. Güýzki kabul edişlik boýunça okuw 2026-njy ýylyň 1-nji sentýabrynda başlar. Bu tapgyra gatnaşmak isleýän dalaşgärler 9–20-nji mart aralygynda onlaýn anketa tabşyrmalydyrlar. Okuwyny ýazda (2027-nji ýylyň 1-nji martyndan) başlamagy meýilleşdirýänler üçin arzalaryň hasaba alnyş döwri 2026-njy ýylyň 31-nji awgustyndan 11-nji sentýabryna çenli dowam eder. Maksatnama koreýany öwreniş we halkara hyzmatdaşlyk ugurlarynda bilimini çuňlaşdyrmak isleýän ýokary derejeli hünärmenleri taýýarlamaga gönükdirilendir. Zerur resminamalaryň doly sanawy, dalaşgärlere bildirilýän talaplar hem-de onlaýn arzany doldurmak boýunça görkezmeler Koreýa Respublikasynyň Türkmenistandaky ilçihanasynyň resmi web sahypasynda ýerleşdirilendir.