Jemgyýet
Türkmenistanyň we Türkiýäniň migrasiýa gulluklary hyzmatdaşlyk mümkinçiliklerini ara alyp maslahatlaşdylar
March 12, 2026 12:32 • UTC+5 (Ashgabat) • 25 views
11-nji martda Türkmenistanyň Döwlet migrasiýa gullugy bilen Türkiýe Respublikasynyň Içeri işler ministrliginiň Migrasiýa müdirligi arasynda wideoaragatnaşyk arkaly iş duşuşygy geçirildi.
11-nji martda Türkmenistanyň Döwlet migrasiýa gullugynyň we Türkiýe Respublikasynyň Içeri işler ministrliginiň Migrasiýa müdirliginiň wekilleriniň arasynda wideoaragatnaşyk arkaly iş duşuşygy geçirildi. Bu barada Döwlet migrasiýa gullugynyň resmi saýtynda habar berildi.
Habarda bellenilişi ýaly, duşuşykda türkmen-türk gatnaşyklarynyň täze mazmuna eýe bolýandygy we ikitaraplaýyn hyzmatdaşlygyň yzygiderli esasda ösdürilýändigi bellenildi.
Taraplar duşuşygyň dowamynda hyzmatdaşlygyň ileri tutulýan ugurlaryny ara alyp maslahatlaşdylar. Şeýle hem iki ýurduň däp bolan dostlukly gatnaşyklarynyň ösüşinde halkara guramalarynyň çäklerindäki özara gatnaşyklaryň orny barada nygtaldy.
Duşuşygyň ahyrynda taraplar özara hyzmatdaşlygyň geljekde hem sazlaşykly ösdüriljekdigine ynam bildirdiler.