Ykdysadyýet
Mawy ýangyjyň bol akymy ýüze çykaryldy
January 21, 2026 16:03 • UTC+5 (Ashgabat) • 14 views
Merkezi Garagumda ýerleşýän Atabaý meýdançasynda tebigy gazyň güýçli akymy ýüze çykaryldy. Gözleg guýusynda geçirilen synaglar gije-gündizde 284 müň kub metre çenli kükürtsiz gaz öndürmegiň mümkindigini görkezdi, bu bolsa sebitiň ýokary gaz mümkinçilikleriniň bardygyny tassyklaýar.
«Lebapnebitgazgözleg» ekspedisiýasynyň zähmetkeş toparlary ýurdumyzyň dürli sebitlerinde alyp barýan gözleg-barlag işleriniň netijeliligi bilen aýratyn tapawutlanýarlar. Ýakynda olar Merkezi Garagumdaky Atabaý meýdançasynda ýene bir guýuda mawy ýangyjyň baý gorunyň bardygyny anykladylar. Bu barada «Türkmenistan» gazetinde habar berildi.
Ak bugdaý etrabynyň çäginde ýerleşýän bu meýdançadaky «Atabaý-1» diýlip atlandyrylan 1200 metrlik baha beriş guýusynda geçirilen synag işleri bu ýerden bir gije-gündiziň dowamynda 284 müň kub metre çenli kükürtsiz gazy alyp boljakdygyny görkezdi. Dokuz gatdan ybarat bolan guýynyň gatlarynyň sekizisinde mawy ýangyjyň bardygy ýüze çykaryldy. Ýakyn geljekde täze guýyny «Döwletabatgazçykaryş» müdirliginiň ygtyýaryna berip, ondan önüm alyp başlamak meýilleşdirilýär.
Tejribeli burawlaýjy Şöhrat Halmyradowyň ýolbaşçylygyndaky topar şu ýylda gözleg-barlag işleriniň ýene birnäçesini geçirmegi meýilleşdirýär.