BAE-niň hususy pudagy Türkmenistanyň maýa goýum mümkinçiliklerine gyzyklanma bildirýär

BAE-niň hususy pudagy täze maýa goýum mümkinçiliklerini gözlemäge hem-de dostlukly döwletler, şol sanda Türkmenistan bilen strategiki hyzmatdaşlygy ýola goýmaga gyzyklanma bildirýär. Bu barada Türkmenistanyň BAE-däki ilçisi Baýram Baýramowyň Şarja Söwda-senagat palatasynyň başlygy Abdulla Sultan Al-Owaýs hem-de BAE-niň Söwda-senagat edaralar federasiýasynyň baş sekretary Hamid Mohammed bin Salem bilen geçiren duşuşygynda aýdyldy. “Al Khaleej” neşiriniň penşenbe güni habar bermegine görä, duşuşygyň dowamynda taraplar iki ýurduň arasynda ykdysady we maýa goýum hyzmatdaşlygyny ösdürmegiň meselelerini ara alyp maslahatlaşdylar, şeýle hem BAE-niň we Türkmenistanyň maýa goýum mümkinçiliklerini gözden geçirdiler. Abdulla Sultan Al-Owaýs iki ýurtda hem maýa goýum gurşawyny gowulandyrmak, haryt dolanyşygyny artdyrmak we bilelikdäki taslamalary durmuşa geçirmek üçin goşmaça mümkinçilikleriň döredýändigini belledi. Baýram Baýramow öz gezeginde Türkmenistanyň Söwda-senagat edarasy tarapyndan wekilçilik edilýän türkmen işewür toparlarynyň BAE bilen söwda we maýa goýum hyzmatdaşlygyny ösdürmäge hem-de çuňlaşdyrmaga isleg bildirýändigini nygtady. Şeýle hem ol türkmen tarapynyň BAE-niň edaralar federasiýasy we Şarja Söwda-senagat edarasy bilen özara hyzmatdaşlygy utgaşdyrmaga taýýardygyny tassyklady. Ilçi BAE-niň işewürler jemgyýetini Türkmenistanyň ykdysadyýetiniň geljegi uly pudaklaryna maýa goýmaga çagyrdy hem-de ýurduň degişli edaralarynyň maýadarlara zerur şertleri we goldawy bermäge taýýardygyny belledi.