Türkmenistanyň ilçisi we Sanly hyzmatdaşlyk guramasynyň Baş sekretary hyzmatdaşlyk meselelerini ara alyp maslahatlaşdylar

2026-njy ýylyň 14-nji aprelinde Türkmenistanyň Saud Arabystany Patyşalygyndaky Adatdan daşary we Doly ygtyýarly ilçisi Muhammetgeldi Ayazow Sanly hyzmatdaşlyk halkara guramasynyň (DCO) Baş sekretary hanym Dima Al-Ýahýa bilen duşuşyk geçirdi. - Türkmenistan bilen bu halkara guramasynyň, şeýle hem oňa agza döwletleriň arasynda özara bähbitli sanly gatnaşyklary ýola goýmak we berkitmek meselelerine garaldy. - Dima Al-Ýahýa guramanyň işi barada giňişleýin maglumat berdi. Ol Merkezi Aziýa bilen agza döwletleriň arasyndaky sanly gatnaşyklaryň, serhetara maýa goýumlarynyň we ýokary derejeli gepleşikleriň utgaşdyrylmagynyň gurama üçin uly ähmiýete eýedigini nygtady. - Ilçi M. Ayazow ýurdumyzda sanly ykdysadyýeti ösdürmäge döwlet derejesinde uly üns berilýändigini belledi. Türkmenistan sanly ulgamda täze tapgyra gadam basýar. Duşuşykda bellenilişi ýaly, ýurdumyzda sanly ykdysadyýeti has-da ösdürmek üçin aşakdaky resminamalar tassyklanyldy: - Täze Konsepsiýa: Sanly ykdysadyýeti ösdürmegiň esasy ugurlaryny kesgitleýän täze garaýyşlar. - Döwlet maksatnamasy: 2026–2028-nji ýyllar aralygynda sanly özgertmeleri durmuşa geçirmegiň anyk meýilnamasy. Bu duşuşyk Türkmenistanyň halkara sanly giňişlige goşulyşmak we innowasion tehnologiýalary durmuşa ornaşdyrmak ugrundaky işjeň diplomatiýasynyň dowamydyr.