Sport
Türkmenleriň «golfy»: Gadymy we meşhur «çilik» oýnunyň syrlary
March 25, 2026 16:03 • UTC+5 (Ashgabat) • 36 views
Türkmen milli oýunlarynyň biri bolan «çilik» özüniň düzgünleri we oýnalyş aýratynlyklary bilen häzirki zaman golf oýnuny ýadyňa salýar. Ýetginjek oglanlaryň arasynda meşhur bolan bu oýnuň taryhy, ulanylýan gurallary we ýeňiş şertleri barada giňişleýin maglumat.
Türkmen halkynyň baý medeni mirasynda sport oýunlary aýratyn orun tutýar. Şolaryň biri-de, özüniň strategiki we fiziki aýratynlyklary bilen dünýä belli golf oýunyna meňzeş bolan «çilik» oýnudyr. Bu oýunda esasy gurallar hökmünde bir gulaç (72,12 sm) uzynlykdaky uly taýak we iki ujy ýiteldilen 25 santimetrlik kiçijik taýajyk — «çilik» ulanylýar. Oýunçylar bu gurallary köplenç berk we çydamly agaç bolan ýylgyndan ýörite taýýarlaýarlar.
Oýnuň düzgünine görä, oýunçylar iki topara bölünip, diametri 10 metre golaý bolan tegelek çyzygyň içinde bäsleşýärler. Nyşana hökmünde ýörite goýlan daş ýa-da gazylan çukurjyk («guduk») hyzmat edýär. Esasy maksat — çiligi taýak bilen urup, ony garşydaşyň meýdançasyna çykarmak ýa-da nyşana degirmekdir. Güýçli urgudan soň çiligiň 100 metre çenli aralyga uçmagy oýunçydan uly ussatlygy talap edýär. Şowsuz synanyşyklar üçin jerime utuklarynyň bellenilmegi bolsa oýnuň gyzyklylygyny we dartgynlylygyny has-da artdyrýar.