Syýasat
Eýranyň Prezidenti Türkmenistanyň Prezidentine gutlag ýollady
February 18, 2026 08:29 • UTC+5 (Ashgabat) • 21 views
Mukaddes Oraza aýynyň ýetip gelmegi mynasybetli Masud Pezeşkian Türkmenistanyň Prezidentine gutlag hatyny iberdi. Hatda Oraza aýynyň jebisligi, raýdaşlygy we haýyr-sogap işleri arkaly ruhy kämilleşmegiň möhümdigi bellenilip, ýurtlaryň arasyndaky hyzmatdaşlygy mundan beýläk-de ösdürmäge taýýarlyk beýan edildi.
Mukaddes Oraza aýynyň ýetip gelmegi mynasybetli Türkmenistanyň Prezidentiniň adyna gutlag hatlary gelip gowuşýar. «Watan» habarlar gepleşiginde habar berlişi ýaly, Türkmenistanyň Prezidentini we türkmen halkyny Allatagallanyň rehimdarlygyny alamatlandyrýan mukaddes Oraza aýynyň ýetip gelmegi bilen Eýran Yslam Respublikasynyň Prezidenti Masud Pezeşkian tüýs ýürekden gutlady.
Gutlag hatynda bellenilişi ýaly, Oraza aýy dünýäniň ähli musulmanlary üçin haýyr-sogap işleri arkaly özlerini kämilleşdirmäge, şeýle hem jebisligi we raýdaşlygy pugtalandyrmaga ajaýyp mümkinçilikdir. Mundan başga-da, hatda bu mübärek aýda bilelikdäki tagallalaryň netijesinde ýurtlaryň arasyndaky hyzmatdaşlygyň mundan beýläk-de ösdüriljekdigine hem-de pugtalandyryljakdygyna berk ynam bildirilýär we gudraty güýçli Allatagalladan Türkmenistanyň Prezidentine hem-de dünýäniň ähli musulmanlaryna bereket dileg edilýär.