Jemgyýet
“EKSPO — 2030” Bütindünýä sergisine Türkmenistanyň gatnaşmagy maslahatlaşyldy
February 13, 2026 15:28 • UTC+5 (Ashgabat) • 54 views
Türkmenistan “EKSPO — 2030” Bütindünýä sergisine gatnaşmak meselelerini maslahatlaşdy. Sergi 2030–2031-nji ýyllarda Er-Riýadda geçiriler. Şeýle hem, Türkmenistan 2027-nji ýylda Ýokohamada geçiriljek “GREENxEXPO 2027” halkara sergisine gatnaşjakdygyny tassyklady.
Türkmenistanyň Saud Arabystany Patyşalygyndaky Adatdan daşary we Doly ygtyýarly ilçisi Muhammetgeldi Aýazow “EXPO 2030 Riyadh” kompaniýasynyň Gyzyklanýan ýurtlar boýunça müdirliginiň ýolbaşçysy Mohammed bin Garady bilen geçiren duşuşygynda “EKSPO — 2030” Bütindünýä sergisine Türkmenistanyň gatnaşmagy bilen bagly meseleler ara alnyp maslahatlaşyldy.
Türkmenistanyň resmi metbugatynyň anna güni habar bermegine görä, “EKSPO — 2030” Bütindünýä sergisi 2030-njy ýylyň oktýabryndan 2031-nji ýylyň marty aralygynda Er-Riýadda geçiriler.
Taraplar Türkmenistanyň bu iri gözden geçirilişe gatnaşmagynyň ýurduň halkara abraýyny has-da ýokarlandyrmaga, onuň dürli ugurlarda gazananlaryny dünýäde wagyz etmäge, daşary ýurtlar bilen söwda-ykdysady gatnaşyklary ösdürmäge ýardam berjekdigine ynam bildirdiler.
Mundan başga-da, Türkmenistan Ýaponiýanyň Ýokohama şäherinde 2027‑nji ýylyň 19‑nji martyndan 26‑njy sentýabry aralygynda geçiriljek “GREENxEXPO 2027” halkara sergisine gatnaşjakdygyny tassyklady.