Türkmenistan üç sany täze serhetüsti optiki-süýümli aragatnaşyk ugurlaryny gurýar

Türkmenistan telekommunikasiýa infrastrukturasyny döwrebaplaşdyrýar: 2028-nji ýyla çenli halkara optiki-süýümli aragatnaşyk ugurlarynyň sany 11-e ýetiriler. Türkmenistanyň Aragatnaşyk ministrligi ykdysadyýetiň sanly özgertmelerine gönükdirilen giň möçberli maksatnamany durmuşa geçirýär. 2026–2028-nji ýyllar üçin Döwlet maksatnamasynyň çäginde täze serhetüsti optiki-süýümli magistrallaryň gurluşygy meýilleşdirilýär. Türkmenistanyň Aragatnaşyk ministrligi halkara aragatnaşygy ösdürmegiň iki esasy ugrunda işleri alyp barýar. Birinji ugur «Arkadagyň Ak ýoly bilen Serhetabat – Hyrat» optiki-süýümli aragatnaşyk ugrunyň gurluşygyny göz öňünde tutýar. Bu taslama üstaşyr maglumat akymlarynyň möçberini artdyrmaga hem-de Hindistanyň telekommunikasiýa hyzmatlary bazaryna çykmaga mümkinçilik döreder. Ikinji strategik taslama Azerbaýjan bilen hyzmatdaşlykda amala aşyrylýar: «Türkmentelekom» we «Azertelekom» kompaniýalary Hazar deňziniň düýbi bilen suwasty optiki-süýümli aragatnaşyk ugruny çekýärler. Şol bir wagtyň özünde Etrek – Inçeburun hem-de Bekdaş – Temirbaba ugurlary boýunça ýerüsti magistrallaryň gurluşygy alnyp barylýar. Bu taslamalaryň durmuşa geçirilmegi halkara optiki-süýümli birikmeleriň sanyny sekizden on bire çenli artdyrmaga we milli maglumat geçiriş ulgamynyň geçirijilik ukybyny birnäçe esse ýokarlandyrmaga mümkinçilik berer. Türkmenistan Merkezi Aziýa sebitinde Gündogar bilen Günbataryň, Demirgazyk bilen Günortanyň arasynda möhüm maglumat-aragatnaşyk köprüsi hökmünde ornuny berkidýär.