Gurbanguly Berdimuhamedow adyndaky Haýyr-sahawat gaznasynyň resmi saýty işe girizildi

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň resmi web-saýty – hemayat.gov.tm işe girizildi. Platforma Gaznanyň işini Türkmenistanyň raýatlary hem-de halkara hyzmatdaşlary üçin mümkin boldugyça açyk we elýeterli etmek maksady bilen döredildi. Saýtda gaznanyň maksady we iş ugurlary barada maglumatlar, täzelikler, foto we wideo materiallar, peýdaly maslahatlar hem-de aragatnaşyk maglumatlary ýerleşdirildi. Gazna 2021-nji ýylyň mart aýynda türkmen halkynyň Milli Lideri Gurbanguly Berdimuhamedowyň başlangyjy bilen döredildi. Guramanyň esasy wezipeleri: ene-atalaryň howandarlygyndan mahrum bolan çagalara giň möçberde goldaw bermek, çylşyrymly lukmançylyk operasiýalaryny we bejergini maliýeleşdirmek, saglygy dikeldiş we sagaldyş çärelerini geçirmek, durmuşa uýgunlaşmaga ýardam bermek, şeýle hem çagalaryň hukuklaryny goramak boýunça halkara hyzmatdaşlygyny ösdürmekden ybaratdyr. Dört ýylyň dowamynda gazna ýüzlerçe çagalara kömek berdi, 700-den gowrak hirurgiki operasiýany we saglygy dikeldiş maksatnamalaryny maliýeleşdirdi. Türkmenistanda we daşary ýurtlarda onlarça haýyr-sahawat taslamalary durmuşa geçirildi. Gazna «Awaza» milli syýahatçylyk zolagynda öz şahamçasyny açdy, BMG-niň Çagalar gaznasy (ÝUNISEF) bilen işjeň hyzmatdaşlyk edýär we hyzmatdaşlyk gatnaşyklaryny giňeltmegi dowam etdirýär. Gurama ýurduň çägindäki çagalar hassahanalarynyň bölümlerini yzygiderli goldap, olara döwrebap tiz kömek awtoulaglaryny, gemodializ enjamlaryny we ýöriteleşdirilen lukmançylyk tehnikalaryny sowgat berýär. Gaznanyň howandarlygynda Arkadag şäherindäki Gurbanguly Berdimuhamedow adyndaky Çagalar sagaldyş-dikeldiş merkezi, şeýle hem paýtagtda we sebitlerde ýerleşýän şoňa meňzeş lukmançylyk-okuw edaralary bar.