"Ýeke-täk penjire" ulgamy eksport-import amallaryny çaltlandyrýar

2025-nji ýylda "Ýeke-täk penjire" ulgamy arkaly elektron görnüşde eksport-import amallary üçin 189 954 sany lisenziýa we rugsatnama resmileşdirildi, bu bolsa 2024-nji ýyldaky görkezijiden 2,7 esse köpdür. Bu barada Türkmenistanyň Döwlet gümrük gullugynyň metbugat gullugy habar berýär. Ulgamyň işi Döwlet gümrük gullugynyň merkezi edarasynyň Gözegçilik-seljeriş merkezi tarapyndan utgaşdyrylýar. Daşary ykdysady işe gatnaşyjylaryň "Ýeke-täk penjire" arkaly gelýän ähli ýüzlenmeleri ygtyýarly döwlet edaralarynyň gözegçiliginde dessin hasaba alynýar we resmileşdirilýär. Bu bolsa eksport-import amallarynyň möhletini gysgaltmaga we daşary söwdanyň netijeliligini ýokarlandyrmaga mümkinçilik berýär. Ulgamda eksport we import çäklerinde hyzmatlaryň 29 görnüşini hödürleýän 19 sany ministrlik we edara hereket edýär. "Ýeke-täk penjire" gije-gündizleýin tertipde işleýär we günde müňe golaý rugsat beriji resminamalaryň resmileşdirilmegini üpjün edýär. Häzirki wagtda ulgamda 12 müňden gowrak daşary ykdysady işe gatnaşyjy hasaba alyndy.