Uçarmanlyk okuwy — 2026: «Türkmenistan» awiakompaniýasyndan täze mümkinçilik

«Türkmenistan» awiakompaniýasy ýurdumyzyň raýat awiasiýasynyň kadrlar goruny güýçlendirmek maksady bilen, täze taslamany amala aşyrýar. Milli awiakompaniýa geljekki uçarmanlary Türkiýäniň Ankara şäherindäki meşhur Awiasiýa Assosiasiýasynyň uniwersitetinde (Türk Hava Kurumu Üniversitesi) okatmak üçin resminamalary kabul edip başlady. Okuwyň şertleri we artykmaçlyklary Dört ýyllyk okuw maksatnamasynyň esasy aýratynlygy — talyplaryň okuw çykdajylarynyň agramly böleginiň döwlet tarapyndan üpjün edilmegidir. Okuwy üstünlikli tamamlajak uçurymlar milli awiakompaniýada azyndan 10 ýyl işlemek borjyny öz üstüne alýarlar. Awiakompaniýa tarapyndan üpjün edilýän hyzmatlar: - Nazaryýet we amaly uçuş okuwynyň doly tölegi; - Talyp şäherçesinde ýaşamak mümkinçiligi; - Her ýyl okuwa gidip-gelmek üçin Aşgabat — Ankara — Aşgabat ugruna mugt uçar petekleri. Talyplar diňe wiza, ätiýaçlandyryş we gündelik iýmit-ulag çykdajylaryny öz ýanyndan töleýärler. Kimler gatnaşyp biler? Bäsleşige aşakdaky talaplara laýyk gelýän Türkmenistanyň erkek raýatlary çagyrylýar: - Ýaşy: 25-den geçmedik bolmaly; - Bilimi: Orta bilimden pes bolmaly däl; - Harby gulluk: Harby biletiniň bolmagy hökmany; - Saglyk: ICAO (Halkara raýat awiasiýasy guramasy) standartlaryna laýyk gelýän lukmançylyk barlagyndan geçmeli. Synag tapgyrlary Resminamalar 2026-njy ýylyň 30-njy iýunyna çenli kabul edilýär. Giriş synaglary iýul aýynyň ilkinji ýarymynda (1–15-nji iýul) Aşgabatdaky Awiasiýa işgärlerini taýýarlamak mekdebinde geçiriler. Dalaşgärler iňlis dili, matematika we fizika dersleri boýunça ukyplaryny görkezerler. Iň soňky tapgyrda bolsa hünärmenler bilen ýörite söhbetdeşlik bolar. Salgymyz: Aşgabat şäheri, A. Annaýew köçesi, «Türkmenistan» awiakompaniýasynyň binasy. Habarlaşmak üçin: 23-47-88, +993-65-72-58-43.