2026-njy ýylyň 25-nji martynda Türkmenistanyň Daşary işler ministriniň orunbasary Mähri Bäşimowa bilen Ýewropa Komissiýasynyň Halkara hyzmatdaşlygy boýunça Baş müdirliginiň (DG INTPA) Merkezi Aziýa we Owganystan boýunça bölüminiň ýolbaşçysy Şarlotta Adrianyň arasynda duşuşyk geçirildi. Bu barada Türkmenistanyň DIM-niň web-saýtynda habar berilýär.

Duşuşygyň dowamynda Türkmenistan bilen Ýewropa Bileleşiginiň arasyndaky hyzmatdaşlygy mundan beýläk-de ösdürmek bilen bagly meseleleriň giň toplumy ara alnyp maslahatlaşyldy.

Taraplar söwda-ykdysady hyzmatdaşlygyň esasy meselelerine hem garadylar. Merkezi Aziýa bilen Ýewropa Bileleşiginiň arasynda ulag-üstaşyr baglanyşygy ösdürmegiň möhümdigi bellenildi.

Gepleşikleriň gün tertibinde energetika ulgamyndaky hyzmatdaşlyk meseleleri aýratyn orun eýeledi. Pudaklaýyn dialogy, şol sanda energetika boýunça hereket edýän hyzmatdaşlyk formatynyň çäklerinde dowam etdirmäge, şeýle hem ýaşyl ösüş we howanyň üýtgemegi bilen bagly gün tertibi ýaly ugurlar boýunça hyzmatdaşlygy giňeltmäge özara gyzyklanma beýan edildi.

Söhbetdeşler medeni-ynsanperwer hyzmatdaşlygyň meseleleri boýunça hem pikir alyşdylar. Hususan-da, Türkmenistanda we sebitde ýaşlary goldamaga, durnukly energetika, söwda, sanly özara baglanyşyk we beýleki ugurlara gönükdirilen ÝB-niň birnäçe maksatnamalaryny we taslamalaryny durmuşa geçirmek bilen bagly meseleler ara alnyp maslahatlaşyldy.

Taraplar Türkmenistan bilen Ýewropa Bileleşiginiň arasyndaky hyzmatdaşlygy ikitaraplaýyn formatda hem-de «Merkezi Aziýa – Ýewropa Bileleşigi» dialogynyň çäklerinde mundan beýläk-de pugtalandyrmaga özara ygrarlydyklaryny tassykladylar.