Ýu. A. Gagarin adyndaky Kosmonawtlary taýýarlamak merkezi Türkmenistanyň Gahrymany Oleg Kononenkonyň "HKS-77" ekspedisiýasynyň çäklerinde "Soýuz MS-31" gämisiniň esasy düzüminiň serkerdesi edilip bellenilendigini mälim etdi. Onuň bilen bilelikde uçuşa kosmonawt Aleksandr Grebýonkin hem ugrar.

Oleg Kononenko üçin bu uçuş hünär ýolundaky altynjy uçuş bolar. Häzirki wagtda ol kosmosda bolmagyň umumy dowamlylygy boýunça dünýäniň resmi rekordçysydyr — onuň görkezijisi 1 110 gije-gündizden hem geçýär. Iň tejribeli hereket edýän kosmonawt hökmünde Kononenko kosmos saparlaryna taýýarlyk görmegi kosmonawtlary taýýarlamak merkezine ýolbaşçylyk etmek bilen utgaşdyrýar.

Oleg Dmitriýewiç Çärjew (häzirki Türkmenabat) şäherinde doguldy we önüp-ösdi, şol ýerdäki 15-nji orta mekdebi tamamlady. Onuň kosmos baradaky arzuwy hut Türkmenistanda döredi we ony ilki Harkow awiasiýa institutyna, soňra bolsa orbita alyp gitdi. Inžener-mehanik Kononenkonyň ilkinji uçuşy 2008-nji ýylyň aprelinden amala aşyryldy.

Oleg Kononenkonyň görnükli üstünlikleri iki ýurduň iň ýokary döwlet sylaglary bilen bellenildi. Ol bir wagtyň özünde hem Russiýa Federasiýasynyň Gahrymany we Türkmenistanyň Gahrymanydyr, şeýle hem "Altyn Aý" medalynyň eýesidir.