BAA xususiy sektori Turkmanistonning investitsiya imkoniyatlariga qiziqish bildirmoqda

BAA xususiy sektori yangi investitsiya imkoniyatlarini izlash hamda do‘stona davlatlar, shu jumladan, Turkmaniston bilan strategik hamkorlikni yo‘lga qo‘yishga qiziqish bildirmoqda. Bu haqda Turkmanistonning BAA dagi elchisi Bayram Bayramovning Sharja Savdo-sanoat palatasi raisi Abdulla Sulton Al-Ovays hamda BAA Savdo-sanoat palatalari federatsiyasi bosh kotibi Hamid Muhammad bin Salem bilan o‘tkazgan uchrashuvida aytib o‘tildi.

“Al Khaleej” nashrining payshanba kuni xabar berishicha, uchrashuv davomida tomonlar ikki mamlakat o‘rtasida iqtisodiy va investitsiyaviy hamkorlikni rivojlantirish masalalarini muhokama qildilar, shuningdek, BAA va Turkmanistonning investitsiya imkoniyatlarini ko‘rib chiqdilar.

Abdulla Sulton Al-Ovays har ikki davlatda investitsiya muhitini yaxshilash, tovar ayirboshlash hajmini oshirish va qo‘shma loyihalarni amalga oshirish uchun qo‘shimcha imkoniyatlar yaratilayotganini ta’kidladi.

Bayram Bayramov o‘z navbatida Turkmaniston Savdo-sanoat palatasi timsolidagi turkman ishbilarmon doiralari BAA bilan savdo va investitsiyaviy hamkorlikni rivojlantirish hamda chuqurlashtirishga intilayotganini qayd etdi. Shuningdek, u turkman tomoni BAA palatalar federatsiyasi va Sharja Savdo-sanoat palatasi bilan o‘zaro hamkorlikni muvofiqlashtirishga tayyorligini tasdiqladi.

Elchi BAA ishbilarmonlar hamjamiyatini Turkmaniston iqtisodiyotining istiqbolli tarmoqlariga sarmoya kiritishga chaqirdi hamda mamlakatning tegishli idoralari investorlarga zarur sharoitlar va yordam berishga tayyorligini bildirdi.