Aşgabatda zamonaviy Toyota savdo va servis markazi qurilmoqda
Turkmaniston poytaxti Aşgabatda Toyota avtomobillarining zamonaviy savdo va xizmat ko‘rsatish markazining qurilishi boshlandi. Obyekt xalqaro me’yorlar va brendning korporativ standartlariga muvofiq barpo etilmoqda. Bu haqda chorshanba kuni Turkmanistonning Yaponiyadagi Elchixonasi ma’lum qildi.
Loyihaning buyurtmachisi Beýik Ýüpek Ýoly kompaniyasi bo‘lib, qurilish yapon investitsiyalari ko‘magi va Toyota Central Asia bilan hamkorlikda amalga oshirilmoqda. Kompleks 2,79 gektarlik maydonda joylashadi.
3S formatidagi dilerlik markazi savdo, servis va original ehtiyot qismlar omborini o‘zida mujassam etadi. Ikki qavatli binoda zamonaviy shourum hamda to‘liq sikldagi servis markazi joylashadi. Savdo maydonida New Retail Concept konsepsiyasi joriy qilinib, mijozlar bilan maslahatlashuvlar va raqamli xizmatlar uchun Customer Hub ochiq makoni tashkil etiladi.
Servis markazi diagnostika, ta’mirlash, kuzov va bo‘yash ishlari, shinalarni almashtirish, dasturiy ta’minotni yangilash kabi barcha texnik xizmat turlarini ko‘rsatadi. Uning quvvati bir vaqtning o‘zida sakkizta avtomobilga xizmat ko‘rsatishga imkon beradi. Shuningdek, kuzov ustaxonasi, deteyling zonasi va zamonaviy yuvish shahobchasi ham bo‘ladi.
Hududda test-drayv maydoni barpo etiladi. Mijozlarga, jumladan, gibrid modellardan iborat eng so‘nggi Toyota avtomobillari taqdim etiladi. Markaz kafolatli va kafolatdan keyingi xizmat ko‘rsatadi.
Qurilishning 2027-yil dekabr oyida yakunlanishi rejalashtirilgan.
