Ashxobod sammitida 2027–2028-yillar uchun MDH yoshlar poytaxtlari eʼlon qilindi
Turkmaniston raisligida poytaxtimiz Ashxoboddagi zamonaviy «Gara gum» mehmonxonasida Mustaqil Davlatlar Hamdoʻstligi (MDH) Hukumat Rahbarlari Kengashining navbatdagi oliy darajadagi majlisi boʻlib oʻtdi.
Majlis kun tartibi doirasida Hamdoʻstlikning xalqaro gumanitar loyihasi boʻlmish «MDH yoshlar poytaxti»ni tanlash masalasi alohida koʻrib chiqildi va tegishli Qaror qabul qilindi. Davlatlararo maslahatlashuvlar natijasida yoshlar tashabbuslarining yetakchi markazlari boʻladigan yangi shaharlar belgilandi.
Qabul qilingan hujjatga muvofiq:
- 2027-yilda — Belarus Respublikasi poytaxti Minsk shahri;
- 2028-yilda — Qozogʻiston Respublikasining Qaragʻanda shahri MDH yoshlar poytaxti deb eʼlon qilindi.
Hamdoʻstlikka aʼzo mamlakatlar shaharlaridan birining bir yil davomida yoshlar siyosati va davlatlararo hamkorlik markaziga aylanishini koʻzda tutuvchi ushbu xalqaro gumanitar loyihaga ilk bor 2024-yilda start berilgan edi. Shunday qilib, Toshkent (Oʻzbekiston), Gabala (Ozarbayjon) va Kapan (Armaniston) shaharlaridan soʻng, ushbu tantanali estafetani Minsk va Qaragʻanda shaharlari davom ettiradi.
Turkmaniston Vazirlar Mahkamasi Raisining oʻrinbosari Xojamirat Geldimiradov raisligida oʻtgan sammitda Rossiya Federatsiyasi Hukumati Raisi Mixail Mishustin, Ozarbayjon Respublikasi Bosh vaziri Ali Asadov, Belarus Respublikasi Bosh vaziri Roman Golovchenko, Qozogʻiston Respublikasi Bosh vaziri Oljas Bektenov, Tojikiston Respublikasi Bosh vaziri Qohir Rasulzoda, Oʻzbekiston Respublikasi Bosh vaziri Abdulla Aripov, Qirgʻiziston Respublikasi Vazirlar Mahkamasi Raisining birinchi oʻrinbosari Adilbek Qasimaliyev hamda MDH Bosh kotibi Sergey Lebedev ishtirok etdi.
