Ashxobodda Turkmaniston raisligida Mustaqil Davlatlar Hamdo‘stligi (MDH) Iqtisodiy kengashining 111-yig‘ilishi bo‘lib o‘tdi. Yig‘ilishda Hamdo‘stlikka a’zo davlatlarning asosiy delegatsiyalari rahbarlari va vakillari, shuningdek, MDH Bosh kotibi Sergey Lebedev ishtirok etdi.

Yig‘ilishni MDH Iqtisodiy kengashi raisi, Turkmaniston Vazirlar Mahkamasi Raisining o‘rinbosari Hojamyrat Geldimyradow ochib berdi va olib bordi. Uchrashuv doirasida ishtirokchilar iqtisodiy hamkorlikning muhim yo‘nalishlari bo‘yicha fikr almashdilar.

MDH Bosh kotibi Sergey Lebedev o‘z nutqida Turkmaniston Prezidenti Serdar Berdimuhamedovga tadbirni yuqori saviyada o‘tkazish uchun yaratilgan sharoitlar va ko‘rsatilgan mehmondo‘stlik uchun minnatdorlik bildirdi. Shuningdek, u turkman xalqini Turkmaniston mustaqilligining 35 yilligi bilan tabriklab, Turkmaniston Xalq Maslahatining bo‘lajak yig‘ilishining ahamiyatini ta’kidladi.

Yig‘ilish davomida iqtisodiy hamkorlikning turli yo‘nalishlari bo‘yicha bir qator muhim masalalar muhokama qilindi. Ishtirokchilar 2026–2030-yillarga mo‘ljallangan transport xavfsizligini ta’minlash strategiyasini amalga oshirish bo‘yicha chora-tadbirlar rejasini tasdiqladilar. Shuningdek, Standartlashtirish bo‘yicha Davlatlararo kengash hamda qishloq xo‘jaligi masalalari bo‘yicha Hukumatlararo kengash faoliyati to‘g‘risidagi hisobotlar ko‘rib chiqildi.

Uchrashuvda innovatsion va texnologik rivojlanish masalalariga ham alohida e’tibor qaratildi. Yuqori texnologiyali tarmoqlar uchun istiqbolli materiallar ishlab chiqarish sohasidagi hamkorlik konsepsiyasi loyihasi, o‘rmon sanoatining raqamli transformatsiyasini rivojlantirish hamda 2030-yilgacha radionavigatsiya tizimini takomillashtirish bo‘yicha tashabbuslar taqdim etildi.

Shuningdek, MDHning bir qator ixtisoslashtirilgan muassasalariga transfuziologiya, tibbiy ta’lim, reabilitatsiya va raqamli rivojlanish yo‘nalishlari bo‘yicha bazaviy tashkilot maqomi berildi.

Yig‘ilish yakunlari bo‘yicha muhokama qilingan 12 ta hujjatni MDH Hukumat rahbarlari kengashi tasdig‘iga kiritish to‘g‘risida kelishuvga erishildi.

MDH Iqtisodiy kengashining navbatdagi yig‘ilishini 2026-yil 27-noyabr kuni Moskvada o‘tkazish rejalashtirilmoqda.