Turkmanistonda elektron viza (e-Visa) xizmatining joriy etilishi «Turkmaniston nefti va gazi – 2026» xalqaro ko‘rgazmasi va konferensiyasida qatnashgan xorijiy delegatlarning mamlakatga kelishini osonlashtirdi. Bu haqda «Turkmen Energy Forum» (TEF) kompaniyasi direktori Nazar Atajanov forum yakunlariga bag‘ishlangan matbuot anjumanida ma’lum qildi.

Uning ta’kidlashicha, elektron viza xizmati tadbir tashkilotchilarining xorijiy ishtirokchilarni qabul qilish bilan bog‘liq ishlarini yengillashtirdi. Turkmaniston Davlat migratsiya xizmati viza olish uchun ariza topshirgan shaxslarga arizalarining holati va ko‘rib chiqish jarayonidagi o‘zgarishlar haqida bevosita ma’lumot beradi. Shuningdek, ariza beruvchilarga tegishli to‘lovlarni mustaqil ravishda amalga oshirish imkoniyati yaratilgan.

Nazar Atajanov forum davomida xorijiy mehmonlarning aloqada bo‘lishini ta’minlash maqsadida ular mamlakatga kelganida bepul internetga ega SIM-kartalar tarqatilganini ham qayd etdi. Bu delegatlarga yaqinlari bilan muntazam aloqada bo‘lish imkonini berdi.

Turkmaniston Davlat migratsiya xizmatining avval xabar berishicha, mamlakatda elektron viza tizimini joriy etish 2026-yil 1-oktabrdan boshlangan. Yangi xizmat xorijiy fuqarolarning vaqtini tejash, hujjatlar aylanishini elektron shaklga o‘tkazish hamda tegishli jarayonlarni qisqa muddatda va soddalashtirilgan tartibda amalga oshirishga qaratilgan.

«Turkmaniston nefti va gazi – 2026» xalqaro ko‘rgazmasi va konferensiyasi 21–23-oktabr kunlari Ashxobod shahrida bo‘lib o‘tdi. Tadbirda dunyoning 75 mamlakatidan qariyb 1,7 ming nafar vakil qatnashdi. Ular 450 dan ortiq kompaniya va xalqaro tashkilot nomidan ishtirok etdilar.

Xalqaro forum Turkmanistonning «Turkmengaz» va «Turkmennebit» davlat konsernlari, «Turkmeng geologiya» davlat korporatsiyasi hamda «Turkmen Energy Forum» kompaniyasi tomonidan tashkil etildi.

Elektron viza xizmatidan foydalanish xalqaro tadbirlarda qatnashuvchi xorijiy delegatlar uchun hujjatlarni rasmiylashtirish jarayonlarini soddalashtirish va Turkmanistonning xalqaro ishbilarmonlik aloqalarini rivojlantirishdagi muhim imkoniyatlardan biri hisoblanadi.