Informatika darsi — texnologiyalar dunyosiga qadam
Hozirgi zamon dunyosida raqamli savodxonlik har bir yosh avlod uchun muhim zaruriyatga aylandi. Xojambaz tumanidagi 21-o‘rta maktabning informatika o‘qituvchisi Ayna Chariyeva o‘zining qiziqarli darslari orqali o‘quvchilarni kompyuter texnologiyalarining sirli dunyosiga yetaklamoqda. O‘qituvchining ta’kidlashicha, zamonaviy uskunalar bilan jihozlangan sinflarda o‘tilayotgan darslar yoshlarning innovatsion fikrlashini rivojlantiradi.
8-sinf o‘quvchilari uchun mo‘ljallangan «Elektron pochta bilan ishlash» mavzusi o‘qituvchining eng qiziqarli darslaridan biridir. Bu mavzuda o‘quvchilarga nafaqat xat yuborish, balki raqamli aloqaning asosiy tamoyillari ham o‘rgatiladi.
Darsda o‘rgatiladigan asosiy tushunchalar:
- E-mail (Elektron pochta): Kompyuter tarmoqlari yordamida xabarlarni qisqa vaqt ichida yuborish va qabul qilish usuli.
- Pochta serveri: Elektron xatlarni qabul qiladigan, saqlaydigan va yuboradigan ixtisoslashtirilgan kompyuter. O‘qituvchi buni oddiy pochta bo‘limining raqamli ko‘rinishi ekanligini, ammo u dam olish kunlarisiz va kecha-yu kunduz ishlashini tushuntiradi.
- Mijoz dasturi: Foydalanuvchining o‘z kompyuterida joylashgan, server bilan aloqa o‘rnatadigan va xatlarni o‘qish imkonini beradigan dasturiy ta’minot.
Ayna muallima darsda nazariy bilimlarni amaliyot bilan uyg‘unlashtiradi. Multimedia doskasi yordamida pochta serverining ishlash sxemasi ko‘rsatiladi. Har bir o‘quvchi alohida kompyuter orqali elektron pochta qutisini boshqarishni, keluvchi va uboriluvchi xatlar uchun mo‘ljallangan papkalar (Kelganlar, Yuborilganlar, Savatcha) bilan ishlashni o‘rganadi.
"Texnologiyalar rivojlanayotgan davrda elektron pochta har bir sohada muhim o‘ringa ega. Biz o‘quvchilarga nafaqat texnologiyadan foydalanishni, balki uning ishlash prinsiplarini ham chuqur o‘rgatmoqdamiz." — Ayna Chariyeva.
Dars yakunida o‘quvchilar o‘rgangan ma’lumotlari asosida mustaqil sxemalar va loyihalar tayyorlaydilar. Bu esa yoshlarning shunchaki "foydalanuvchi" bo‘lmay, balki kelajakda texnologiyalarni takomillashtira oladigan mutaxassislar bo‘lib yetishishiga yordam beradi.
