Turkmaniston va Turkiya TIV rahbarlari o‘rtasida telefon muloqoti bo‘lib o‘tdi

Kecha Turkmaniston Tashqi ishlar vaziri Rashid Meredov hamda Turkiya Respublikasi Tashqi ishlar vaziri Xoqon Fidan o‘rtasida telefon orqali muloqot bo‘lib o‘tdi. Ikki davlat tashqi siyosat idoralari rahbarlari davlatlararo munosabatlarning hozirgi holati va istiqbollarini muhokama qildilar.

Suhbat davomida diplomatlar o‘zaro hamkorlikning ustuvor yo‘nalishlarini ko‘rib chiqish bilan bir qatorda, mintaqaviy va xalqaro miqyosdagi muhim masalalar yuzasidan fikr almashdilar. Tomonlar o‘zaro manfaatli hamkorlik strategik xususiyatga ega ekanligini yana bir bor tasdiqladilar.

Muloqotda xalqaro maydondagi aloqalarga, xususan, nufuzli xalqaro tashkilotlar, yirik forumlar va diplomatik uchrashuvlar doirasidagi hamkorlikka alohida o‘rin berildi. Ikki davlat xalqaro tashabbuslarda bir-birini qo‘llab-quvvatlashga tayyor ekani ta’kidlab o‘tildi.