Turkmanistonda tabiiy gaz uchun onlayn to‘lov qilish imkonini beruvchi yangi mobil ilova yaratildi

Turkmanistonda iste’mol qilingan tabiiy gaz uchun raqamli to‘lovlarni amalga oshirish maqsadida “Milli ÝJH” mobil ilovasi ishlab chiqildi. Bu haqda seshanba kuni chop etilgan “Nebit-Gaz” gazetasida xabar berildi.

“Türkmengazüpjünçilik” birlashmasining markaziy binosida “Ynamly Belentlik” xo‘jalik jamiyati tomonidan “Hisob-kitob markazi” tizimi yaratilib, “Aşgabatgaz”, “Arkadagşähergaz” va viloyat gaz ta’minoti boshqarmalari markazlarida internet tarmog‘iga ulandi.

Hozirgi vaqtda Turkmaniston hududidagi tabiiy gaz iste’molchilari “Türkmengazüpjünçilik” birlashmasining veb-sayti hamda “Milli ÝJH” mobil ilovasi orqali to‘lovlarni amalga oshirishlari mumkin.

Shuningdek, “Türkmengazüpjünçilik” birlashmasi portalida gaz hisoblagichlarini o‘rnatish, turli gaz uskunalarini ta’mirlash va texnik xizmat ko‘rsatish, gaz quvurlari va uskunalarini texnik ko‘rikdan o‘tkazish uchun mutaxassis chaqirish kabi qator xizmatlar ham yo‘lga qo‘yilgan.