Turkmanistonlik yosh olimlar Bangkokda o‘tkazilgan loyiha tanlovida mukofotlarga sazovor bo‘ldi

Turkmanistonning O‘g‘uzxon nomidagi Muhandislik-texnologiyalar universiteti vakillari 29-yanvardan 2-fevralgacha Tailand Qirolligining Bangkok shahrida bo‘lib o‘tgan “World Youth STEM Invention Innovation (WYSII – 2026)” loyiha tanlovida nufuzli mukofotlarga sazovor bo‘lishdi.

O‘g‘uzxon nomidagi Muhandislik-texnologiyalar universiteti Kimyoviy texnologiyalar kafedrasining o‘qituvchi-tadqiqotchisi Patma Igdirova “INTERACT – 2026” xalqaro konferensiyasida ishtirok etib, mandragora o‘simligidan biofaol moddalarni ajratib olish usullari bo‘yicha ilmiy tadqiqotini muvaffaqiyatli taqdim etdi. Dorivor o‘simlik tarkibidagi moddalar metabolizmini o‘rganishga doir yangi yondashuvlar xalqaro ekspertlar tomonidan yuqori baholandi. Natijada, turkmanistonlik olima ikki yuksak mukofotga sazovor bo‘ldi: ta’lim sohasidagi innovatsiyalar uchun “INTERACT – 2026 INNOVATIVE EDUCATOR AWARD” va ilmiy ishlarning ahamiyati hamda innovatsion mazmuni uchun “GOLD AWARD”.

“WYSII – 2026” tanlovida Kimyoviy va nanotexnologiyalar fakultetining 3-bosqich talabasi Mekan Rozmyradovning “Ekologik toza va yuqori mustahkam keratin asosidagi bioplastik materiallar olishning innovatsion usullari” mavzusidagi loyihasi hay’at tomonidan e’tirof etilib, “Ekologiya va barqaror rivojlanish” yo‘nalishi bo‘yicha eng yaxshi beshlikdan joy oldi.

Ilmiy ishi uchun Mekan Rozmyradov tanlovning eng oliy mukofoti — oltin medal bilan taqdirlandi.

Bu yutuqlar O‘g‘uzxon nomidagi Muhandislik-texnologiyalar universitetining kuchli ilmiy-tadqiqot salohiyatini hamda olib borilayotgan tadqiqotlarning amaliy ahamiyatini yana bir bor namoyon etdi.