Qirg‘iziston va O‘zbekiston suv sohasida hamkorlikni mustahkamlaydi
Manas shahrida Qirg‘iziston va O‘zbekiston o‘rtasidagi suv xo‘jaligi bo‘yicha qo‘shma komissiyaning ettinchi yig‘ilishi bo‘lib o‘tdi, deb xabar beradi Kazinform.
Tomonlar suv resurslaridan oqilona foydalanish, suv-energetika xavfsizligini ta’minlash va mintaqaviy rivojlanish istiqbollari masalalarini muhokama qildilar.
Qirg‘iziston Vazirlar Mahkamasi raisining o‘rinbosari, suv resurslari, qishloq xo‘jaligi va qayta ishlash sanoati vaziri Baqit Torobayev suv resurslarini hamkorlikning ustuvor yo‘nalishlaridan biri deb atadi.
Uning so‘zlariga ko‘ra, Qirg‘iziston mintaqaning asosiy daryolarining yuqori oqimida joylashgan davlat sifatida past oqimdagi mamlakatlarni suv bilan ta’minlash majburiyatlarini muntazam bajarib kelmoqda va shu orqali Markaziy Osiyo oziq-ovqat va ekologik xavfsizligiga hissa qo‘shmoqda. Suv esa, uning fikricha, nizo manbai emas, balki do‘stlik va barqaror taraqqiyot asosi bo‘lishi kerak.
Qirg‘iz tomoni yangi tashabbuslar ilgari surdi, jumladan, tomchilatib va avtomatlashtirilgan sug‘orish tizimlarini chegaradosh hududlarda joriy etish, “Do‘stlikning Yashil kamari” loyihasi orqali o‘rmonlarni tiklash va cho‘llanishga qarshi kurashish hamda suv-energetika sohasida davlat organlari o‘rtasidagi hamkorlikni kuchaytirish.
Yig‘ilishda, shuningdek, Kambarota GES-1 va Xitoy–Qirg‘iziston–O‘zbekiston temir yo‘li kabi qo‘shma loyihalarning ahamiyati ta’kidlandi. Ushbu loyihalar mintaqaning energetika salohiyatini oshirish va transport aloqalarini mustahkamlash imkonini beradi.
Bundan avvalroq, Dushanbe shahrida Qirg‘iziston va Tojikiston suv xo‘jaligi bo‘yicha qo‘shma komissiyasining birinchi yig‘ilishi bo‘lib o‘tgani xabar qilingan edi.
