“Real” safarda “Atletik”ni 3:0 hisobida yirik mag‘lub etdi. Asosiy qahramon — Mbappe
La Liga 19-turi doirasidagi safar o‘yinida “Real Madrid” “Atletik Bilbao”ni 3:0 hisobida mag‘lub etdi. Bilbao shahrida bo‘lib o‘tgan uchrashuv madridliklarning ishonchli g‘alabasi bilan yakunlandi.
Uchrashuvning bosh qahramoni “Qirollik klubi” hujumchisi Kilian Mbappe bo‘ldi — u dubl qayd etdi va golga uzatma berdi. Mbappe 7-daqiqada ajoyib yakka reyddan so‘ng hisobni ochdi. Tanaffus oldidan esa bosh bilan Eduardo Kamavingaga aniq uzatma berdi, Kamavinga ham bosh bilan to‘pni darvozaga yo‘lladi.
59-daqiqada Mbappe jarima maydonchasidan tashqaridan aniq zarba bilan gol urdi.
“Real” La Ligadagi ketma-ket uchta durangdan iborat omadsiz seriyasiga nuqta qo‘ydi va 36 ochko bilan turnir jadvalida ikkinchi o‘rinda bormoqda, yetakchi “Barselona”dan atigi 1 ochkoga ortda. “Atletik” 20 ochko bilan sakkizinchi o‘rinda joylashgan.
