Soch tushishining kutilmagan sababi ma’lum bo‘ldi

Har kuni bir xil soch turmagini qilish soch chiziqlarining seyraklashishiga va ularning ingichkalashishiga sabab bo‘lishi mumkin. Bunday turdagi soch tushishga tartibga bog‘liq alopesiya deyiladi. Bu haqda Londonlik trixolog Reýchel Valentayn Daily Mail nashriga ma’lum qildi.

Ekspertning aytishicha, har kuni takrorlanadigan soch turmagi sochlarni mo‘rt qiladi. Buning sababi — soch tolalaridagi tabiiy “bukilishlar” doim bir joyda hosil bo‘lishidir. Og‘ir soch aksessuarlari, masalan, “krab” qisqichlar ayniqsa xavfli hisoblanadi. Ular boshning tepa qismida doimiy tortish hosil qiladi va vaqt o‘tishi bilan soch follikulalariga zarar yetkazadi hamda soch tushishini tezlashtiradi.

“Avvaliga bu holat engil seyraklashish bilan namoyon bo‘ladi, ammo vaqt o‘tishi bilan soch o‘smaydigan joylar paydo bo‘lishi mumkin. Soch ildizlariga tushadigan yukni kamaytirish uchun soch turmagini har kuni o‘zgartirish kerak. Turli aksessuarlarni ishlatish shart emas — qisqichning joylashuvini o‘zgartirish yetarli,” deydi ekspert.

Shuningdek, shifokor sochni bog‘lash uchun tekis va yumshoq rezinkani ishlatishni tavsiya qiladi, bu bosh terisida tortishishni teng taqsimlaydi. Bundan tashqari, ekspert sochlarni vaqti-vaqti bilan ochiq holda yurishni ham eslatadi.