Turkmaniston Prezidenti Xalqaro Betaraflik kuni munosabati bilan 230 dan ortiq odamni afv etdi
Turkmaniston Prezidenti Serdar Berdimuhamedov 12-dekabrda nishonlanadigan Xalqaro Betaraflik kuni munosabati bilan 231 nafar sudlangan fuqaroni afv etish to‘g‘risidagi farmonga imzo chekdi. Bu haqda TDH davlat axborot agentligi xabar berdi.
Qaror kengaytirilgan Vazirlar Mahkamasi yig‘ilishida qabul qilindi. Unda Turkmanistonning xorijdagi diplomatik vakolatxonalari va konsullik muassasalari rahbarlari, shuningdek xalqaro tashkilotlardagi vakillari ishtirok etdi. Yig‘ilishda betaraf davlatning tashqi siyosatiga oid ustuvor masalalar muhokama qilindi.
Davlat rahbari yig‘ilish ishtirokchilarini va barcha turkman xalqini Turkmanistonning doimiy betarafligining ulug‘ 30 yilligi bilan samimiy tabrikladi. Afv bo‘yicha amalga oshirilgan ishlar natijalari haqida Davlat xavfsizlik kengashi kotibi, Turkmaniston Prezidenti huzuridagi fuqarolik va afv masalalari bo‘yicha takliflar tayyorlash komissiyasi raisi Begench Gundogdyev hisobot berdi.
“Hisobot tinglangandan so‘ng, Prezident Serdar Berdimuhamedov ushbu ezgu an’anaga amal qilgan holda Xalqaro Betaraflik kuni munosabati bilan 231 nafar fuqaroni afv etish to‘g‘risidagi farmonga imzo chekdi,” — deyiladi xabarda.
Prezident Komissiya raisiga huquqni muhofaza qilish organlari rahbarlari bilan hamkorlikda ozod qilinganlarning tez fursatda oilalariga qaytishini ta’minlash bo‘yicha zarur choralar ko‘rishni topshirdi. Serdar Berdimuhamedov afv etilgan fuqarolarga halol mehnat qilishni va Vatanga sadoqat bilan xizmat qilishni tiladi.
