Turkmaniston va Qozog‘iston to‘g‘ridan-to‘g‘ri aviaqatnovlarni yo‘lga qo‘yish imkoniyatini ko‘rib chiqadi
Turkmaniston va Qozog‘iston ikki davlat shaharlari o‘rtasida to‘g‘ridan-to‘g‘ri tijoriy aviaqatnovlarni yo‘lga qo‘yish imkoniyatini o‘rganishga kelishib oldi. Bu haqda Qozog‘iston Prezidenti Qasim-Jomart Toqayev Turkmaniston Prezidenti Serdar Berdimuhammedov bilan Ostona shahridagi muzokaralar yakuni bo‘yicha ma’lum qildi, deb xabar beradi Qozog‘iston Prezidentining matbuot xizmati.
Qozog‘iston Prezidenti Qasim-Jomart Toqayevning aytishicha, ikki tomonlama savdo hajmi barqaror ravishda 500 million dollardan oshmoqda va tomonlar o‘zaro savdo hajmini bir milliard dollarga yetkazish choralarini kelishib oldilar. Buning uchun qo‘shma savdo uylari tashkil etilishi va o‘zaro savdoni oshirish bo‘yicha ish rejasi amalga oshirilishi rejalashtirilgan.
Toqayevning so‘zlariga ko‘ra, 2025-yilning dastlabki o‘n oyida ikki davlat o‘rtasidagi yuk tashish hajmi 1,5 million tonnaga yetgan.
Prezidentlar, shuningdek, mintaqani Afg‘oniston orqali Janubiy Osiyo bilan bog‘laydigan temir yo‘l liniyasi qurish istiqbollarini ham muhokama qildilar.
Turkmaniston va Qozog‘iston Prezidentlari o‘rtasidagi muzokaralar yakunida qator kelishuvlar ham imzolandi.
