Turkmenistonda tezlik oshirish uchun jazolar kuchaytirildi
Bugundan boshlab Turkmenistonda haydovchilar tomonidan yo‘l harakati qoidalarining buzilishi uchun jarimalar oshirildi. Bu haqda markaziy matbuotda e’lon qilingan Ma’muriy huquqbuzarliklar to‘g‘risidagi kodeksga kiritilgan o‘zgartish va qo‘shimchalarda qayd etilgan.
Xususan, ruxsat etilgan maksimal tezlikni 10 km/soatdan ortiq, ammo 30 km/soatdan ko‘p bo‘lmagan miqdorda oshirganlik uchun jarima 0,5 bazaviy qiymatdan ikki bazaviy qiymatgacha oshirildi*. Tezlikni 30 km/soatdan ortiq, ammo 50 km/soatdan ko‘p bo‘lmagan tarzda oshirganlik uchun jarima uchdan besh bazaviy qiymatgacha ko‘tarildi. Qoidabuzarlik takrorlangan taqdirda jarima yetti bazaviy qiymatni tashkil qiladi.
Tezlikni 50 km/soatdan ortiq oshirganlik uchun jarima yettidan o‘nga bazaviy qiymatgacha oshiriladi. 6 oy ichida takroriy qoidabuzarlik haydovchilik guvohnomasidan bir yilga mahrum etishga olib keladi.
Qizil chiroqdan o‘tish endilikda uch bazaviy qiymat miqdorida jarima bilan jazolanadi.
Transport vositasini noto‘g‘ri to‘xtatish yoki park qilish – ikki bazaviy qiymat miqdorida jarima solinishiga sabab bo‘ladi.
Ajratilgan yo‘lakda harakatlanish uchun jarima 10 baravar oshirilib, besh bazaviy qiymat etib belgilandi.
Davlat texnik ko‘rigidan o‘tmagan yoki davlat raqam belgilarining o‘qilmaydigan holati bilan transport boshqarganlik uchun jarima ham ikki baravar oshirildi.
Piyodalarga eslatib o‘tamiz: Yo‘l harakati qoidalarini buzish, ustuvorlik belgilariga, yo‘l chiziqlariga yoki svetofor signallariga bo‘ysunmaslik 0,4 bazaviy qiymat miqdorida jarima bilan jazolanadi. Takroriy qoidabuzarlik uchun bir bazaviy qiymat miqdorida jarima belgilanadi.
*Izoh: Bugungi kunda bir bazaviy qiymat 100 manatga teng.
