Dünýä işewürleriniň üns merkezinde: Türkmen önümlerine bolan isleg artýar

Geçen hepdede Türkmenistanyň Döwlet haryt-çig mal biržasy halkara hyzmatdaşlygynyň işjeň merkezine öwrülip, jemi 53 sany şertnamany hasaba aldy. Birleşen Arap Emirlikleriniň, Türkiýäniň, Owganystanyň, Gruziýanyň we Özbegistanyň işewürlik wekilleri ýurdumyzyň nebitgaz pudagynyň önümlerine uly gyzyklanma bildirdiler.

Daşary ýurt puluna «Türkmennebit» döwlet konserniniň tehnologik desgalarynda öndürilen polipropilen, binýatlyk ýag we awtobenzin ýerlenildi. Şunuň bilen birlikde, singapurly telekeçiler «Türkmenhimiýa» döwlet konserniniň kärhanasynda öndürilen karbamidiň iri tapgyryny satyn aldylar.

Hepdelik eksport sanawy dokma we oba hojalyk senagatynyň önümleri bilen hem baýlaşdy. BAE-den, Türkiýeden we Azerbaýjandan gelen daşary ýurtly alyjylar bugdaý ununy, žakkard matalaryny hem-de dürli görnüşli pamyk önümlerini, lukmançylyk pagtasyny, pagta taýajyklaryny we nah ýüplükleri satyn aldylar.

Daşary ýurt puluna baglaşylan şertnamalaryň umumy bahasy 350 million 748 müň ABŞ dollaryna deň boldy. Bu bolsa türkmen önümleriniň dünýä bazaryndaky ýokary bäsdeşlige ukyplylygyny ýene-de bir gezek tassyklady.

Söwdalaryň ýokary depgini içeri bazar segmentinde hem duýuldy. Ýerli telekeçiler milli senagatyň zerurlyklary üçin birnäçe möhüm ylalaşyklary baglaşdylar. Milli manatdaky söwdalarda «Türkmennebit» döwlet konserninden polipropilen, binýatlyk ýag, gyzdyryş ýangyjy we gaplaýyş plýonkasy, şeýle hem bugdaý ununyň tapgyrlary satyn alyndy.

Hepdäniň netijeleri boýunça içerki geleşikleriň umumy möçberi 269 million 30 müň manada deň boldy. Birža hepdesiniň netijeleri ýurduň eksport kuwwatynyň durnukly ösüşini we milli öndürijileriň orunlarynyň berkeýändigini aýdyň görkezýär.