Türkmenistanyň Senagatçylar we telekeçiler birleşmesiniň agzasy bolan «Kenar» kompaniýasy ýokary hilli önümleri bilen içerki bazary yzygiderli üpjün edip, balyk senagatyndaky öňdebaryjy ornuny has-da berkidýär.

2017-nji ýyldan bäri üstünlikli işleýän bu kärhanada her gün saýlama çig malyň uly möçberi gaýtadan işlenilýär. Önümçilikde ýerli balyklar bilen bir hatarda, Ýewropa Bileleşiginiň ýurtlaryndan getirilýän çig mallaryň hem ulanylmagy ýylyň dowamynda önümleriň görnüşleriniň köp bolmagyna mümkinçilik berýär.

«Kenar» kompaniýasynyň önümçilik hatary hatda iň talapkär alyjylaryň hem isleglerini kanagatlandyryp biljek dürli görnüşli önümleri öz içine alýar. Kompaniýanyň önümleriniň arasynda ýagda taýýarlanan Atlantik takgaz balygynyň filesi, az duzlanan gyzyl balygy, sowuklygyna tüssede kakadylan skumbriýa, şeýle hem köpleriň söýüp iýýän salaka, çapak we kilka ýaly balyk önümleri bar. Önümleriň düzümindäki Omega-3 ýag kislotalarynyň we minerallaryň ýokary mukdary olary sagdyn iýmitiň möhüm bölegine öwürýär.

Kärhananyň Germaniýanyň, Polşanyň, Russiýanyň we Türkiýäniň öňdebaryjy öndürijileriniň awtomatlaşdyrylan ugurlary bilen enjamlaşdyrylmagy serişdeleri tygşytlaýjy ýörelgeleri ornaşdyrmaga şert döredýär. Mundan başga-da, innowasion wakuumly gaplamalaryň ulanylmagy önümiň tebigy tagamynyň, terliginiň we ýokumlylyk gymmatynyň saklanyş möhletiniň dowamynda doly saklanmagyna kepil geçýär.

Önümleriň her bir tapgyrynyň howpsuzlygy berk gözegçilikde saklanylýar we halkara HACCP (Hazard Analysis and Critical Control Points) güwänamasy bilen tassyklanylýar. Kompaniýanyň hususy sowadyjyly ulaglar parky harytlary ýurdumyzyň ähli welaýatlaryna eltip, olaryň önümçilikden çykan ýaly terligini üpjün edýär.

Kompaniýa öz gazananlaryny Türkmenistanyň Senagatçylar we telekeçiler birleşmesiniň döredilmeginiň 18 ýyllygyna bagyşlanyp geçirilen milli ykdysadyýetiň hususy böleginiň gazananlarynyň sergisinde görkezdi. Şu günki günde «Kenar» kompaniýasy tehniki taýdan döwrebaplaşmaga we täze satuw bazarlaryny özleşdirmäge aýratyn üns berýär we bu bolsa ýerli önümleriň daşary ýurtlarda bäsleşige ukyplylygyny tassyklaýar.