Türkmenistanyň ulag infrastrukturany döwrebaplaşdyrmak we täzelenýän energetikany ösdürmek boýunça meýilnamalary Ýewropa Maýa goýum bankynyň (EIB) ileri tutulýan ugurlaryna laýyk gelýär. Bu barada EIB-niň Merkezi Aziýa boýunça Sebitleýin wekilhanasynyň ýolbaşçysy Oliwýe Kýueni “Trend” agentligine beren interwýusynda aýtdy.

Bankyň Merkezi Aziýa boýunça Sebitleýin wekilhanasynyň ýolbaşçysynyň aýtmagyna görä, şeýle başlangyçlar Ýewropa maýa goýum bankynyň howanyň üýtgemegine çydamly ykdysadyýetleri ösdürmäge gönükdirilen ornuny görkezýär.

EIB-niň Merkezi Aziýa boýunça Sebitleýin wekilhanasynyň ýolbaşçysy iş ýüzünde parnik gazlarynyň zyňyndylaryny azaldýan, energiýa netijeliligini ýokarlandyrýan we arassa tehnologiýalary ulanmagy höweslendirýän taslamalar ileri tutulyp, maliýe serişdeleriniň berilýändigini aýtdy.

Oliwýe Kýueni Ýewropa maýa goýum bankynyň Merkezi Aziýada “Global Gateway” başlangyjynyň çäginde Ýewropa Bileleşiginiň ileri tutýan ugurlaryna laýyklykda hereket edýändigini aýtdy we bu ýerde Transhazar ulag geçelgesini (Orta geçelge), sanly arabaglanyşygy, arassa energetika we suw hojalygy boýunça taslamalary, şeýle hem möhüm çig mal serişdeleri bilen baglanyşykly başlangyçlary ösdürmek barada gürrüň gidýändigini nygtady.

Oliwýe Kýueni Hazar deňzine çykalgasy bolan Türkmenistanyň Orta geçelgäniň möhüm bölegi bolup çykyş edýändigini belledi. Şeýle hem ol demir ýol we awtoulag ýol infrastrukturasynyň ösdürilmeginiň, hereket edýän düzümiň täzelenmeginiň hem-de portyň has-da döwrebaplaşdyrylmagynyň sebitleriň arasyndaky ýük daşamalaryň wagtyny we çykdajylaryny azaltmaga, şeýlelikde söwdanyň giňelmegine hem-de ykdysady ösüşe ýardam edip biljekdigini aýtdy.

Şeýle hem Ýewropa Maýa goýum banky taslamalaryň uzak möhletleýin durnuklylygyny bahalandyrýar, dolandyryşyň aç-açanlygyna, ekologik seljerişe we gyzyklanýan taraplaryň gatnaşmagyna aýratyn üns berýär. Şeýle çemeleşme ekologik talaplaryň berjaý edilmegi bilen durnukly ykdysady netijeleri üpjün etmäge gönükdirilendir.