2026-yil 23-oktabr kuni Gruziyaning Batumi shahrida Gruziya bosh vazirining o‘rinbosari, tashqi ishlar vaziri Maka Bochorishvili hamda Markaziy Osiyo davlatlarining tashqi ishlar vazirlari o‘rtasida uchrashuv bo‘lib o‘tadi.

Gruziya Tashqi ishlar vazirligining ma’lum qilishicha, uchrashuvda Turkmaniston tashqi ishlar vaziri Rashid Meredov, Qozog‘iston tashqi ishlar vaziri Muxtar Tleuberdi, Qirg‘iziston tashqi ishlar vaziri Jeenbek Kulubayev, Tojikiston tashqi ishlar vaziri Sirojiddin Muhriddin va O‘zbekiston tashqi ishlar vaziri Baxtiyor Saidov ishtirok etishi kutilmoqda.

Tashrif doirasida Maka Bochorishvili Markaziy Osiyo mamlakatlari tashqi siyosat idoralari rahbarlari bilan ikki tomonlama uchrashuvlar ham o‘tkazadi.

Mazkur uchrashuvlar Gruziya va Markaziy Osiyo davlatlari o‘rtasidagi siyosiy muloqotni rivojlantirish hamda o‘zaro aloqalarni mustahkamlash uchun muhim imkoniyat bo‘lishi mumkin.