15-oktabr kuni Xitoy Xalq Respublikasi va Koreya Xalq Demokratik Respublikasi (KXDR) o‘rtasidagi savdo va transport aloqalarini rivojlantirishda muhim ahamiyatga ega bo‘lgan yangi avtomobil ko‘prigi rasman foydalanishga topshirildi.

Uzunligi 3 kilometr 26 metrni tashkil etadigan ko‘prik Yalu daryosi ustidan o‘tadi. U Xitoyning chegaradosh Dandun shahrini KXDRning Sinŭiju shahri bilan bog‘laydi. Yangi transport o‘tish joyi ikki mamlakat o‘rtasidagi tovar ayirboshlash hajmini oshirish va transchegaraviy logistika imkoniyatlarini kengaytirishga xizmat qilishi kutilmoqda.

Ko‘prikning foydalanishga topshirilishiga bag‘ishlangan marosim Dandun shahrida bo‘lib o‘tdi. Unda yuzlab kishi ishtirok etdi. Tadbir doirasida ikki mamlakatning davlat bayroqlari va gullar bilan bezatilgan yuk avtomobillari ko‘prikdan tantanali ravishda o‘ta boshladi.

Yangi ko‘prik Xitoy va KXDR o‘rtasidagi transport qatnovini rivojlantirish, yuk tashishni yengillashtirish hamda savdo hamkorligini mustahkamlashga xizmat qiladigan muhim infratuzilma obyekti hisoblanadi.