Yevropa tiklanish va taraqqiyot banki (YTTB) Turkmanistondagi investitsiya faoliyatini kengaytirish, xususiy sektor, transport infratuzilmasi va logistika tizimini qo‘llab-quvvatlashni maqsad qilgan. Bu haqda bankning Turkmanistondagi vakolatxonasi rahbari Erik Livni Ozarbayjonning Trend axborot agentligiga bergan maxsus intervyusida ma’lum qildi.

Erik Livnining so‘zlariga ko‘ra, bank faoliyatining ustuvor yo‘nalishlaridan biri xususiy korxonalar va mahalliy moliya muassasalari bilan hamkorlikni rivojlantirishdan iborat. Shu munosabat bilan YTTB xorijiy valyutada daromad oladigan va eksportga yo‘naltirilgan xususiy kompaniyalarni bevosita moliyalashtirishni qayta yo‘lga qo‘yishni rejalashtirmoqda. Mazkur imkoniyat 2026-yil iyul oyida Turkmaniston Markaziy banki bilan imzolangan Hamkorlik to‘g‘risidagi memorandumda ham nazarda tutilgan.

Dastlabki investitsiya loyihalari qayta ishlash sanoati, qishloq xo‘jaligi, logistika va eksportga yo‘naltirilgan xizmatlar sohasidagi korxonalarni qamrab olishi kutilmoqda. Shuningdek, bank kichik va o‘rta biznesni kreditlash imkoniyatlarini kengaytirish maqsadida Turkmaniston tijorat banklari bilan hamkorlik o‘rnatish imkoniyatlarini o‘rganmoqda.

YTTB transport-logistika infratuzilmasini rivojlantirishga ham alohida e’tibor qaratmoqda. Bu boradagi ustuvor loyihalar qatoriga temir yo‘l tarmog‘ining ayrim uchastkalarini modernizatsiya qilish, yuk tashish infratuzilmasining o‘tkazish quvvatini oshirish hamda Transkaspiy xalqaro transport yo‘lagi doirasidagi logistika jarayonlarini takomillashtirish kiradi.

Bankning Turkmanistondagi vakolatxonasi rahbari qayta tiklanuvchi energiya manbalari, energiya samaradorligini oshirish, chiqindilarni kamaytirish, suv ta’minoti va chiqindilarni boshqarish sohalarida ham hamkorlikni rivojlantirish imkoniyatlari mavjudligini ta’kidladi.

Erik Livnining qayd etishicha, bankning maqsadi faqat o‘z mablag‘lari hisobidan investitsiyalar kiritish bilan cheklanmaydi. YTTB Turkmanistonga qo‘shimcha xalqaro kapital va tajribali mutaxassislarning bilimlarini jalb etishga ko‘maklashuvchi hamkor sifatida ham faoliyat yuritishni maqsad qilgan.

Uning ta’kidlashicha, erishilgan kelishuvlar amalga oshirilib, istiqbolli investitsiya loyihalari portfeli shakllantirilsa, bankning Turkmanistondagi faoliyati yaqin yillarda bosqichma-bosqich kengaytirilishi mumkin.

Bank ma’lumotlariga ko‘ra, 1992-yilda Turkmaniston bilan hamkorlik boshlanganidan buyon YTTB 87 ta loyihani moliyalashtirgan. Ushbu loyihalarga yo‘naltirilgan investitsiyalarning umumiy hajmi 322 million yevroga yetgan.

Eslatib o‘tamiz, 2026-yil iyul oyida YTTB prezidenti Odil Reno-Bassoning Turkmanistonga tashrifi davomida tomonlar hamkorlikni rivojlantirish bo‘yicha beshta o‘zaro anglashuv memorandumini imzolagan edi. Hujjatlar bank faoliyati, energetika, atrof-muhitni muhofaza qilish, transport infratuzilmasi va shahar xo‘jaligini rivojlantirish kabi yo‘nalishlarni qamrab oladi.