2009–2026: Turkmaniston Xitoyga 460 milliard kub metr gaz yetkazib berdi

Turkmaniston–Xitoy gaz quvuri 2009-yilda ishga tushirilganidan buyon 2026-yil 1-mart holatiga ko‘ra yetkazib berilgan turkman tabiiy gazining umumiy hajmi 460 milliard kub metrga yetdi. Bu haqda Xitoy Xalq Respublikasining Turkmanistondagi favqulodda va muxtor elchisi Szi Shumin juma kuni Ashxobodda o‘tkazilgan matbuot brifingida ma’lum qildi.

“Energetika sohasidagi hamkorlik ikki tomonlama munosabatlarning asosiy yo‘nalishlaridan biri bo‘lib qolmoqda. Xitoy ko‘p yillar davomida turkman tabiiy gazining eng yirik importchisi hamda mamlakatning yetakchi savdo sheriklaridan biri bo‘lib kelmoqda”, — dedi elchi.

Hozirgi vaqtda gaz quvurining A, B va C tarmoqlari orqali Xitoyga har yili qariyb 40 milliard kub metr gaz eksport qilinmoqda. D tarmog‘i to‘liq ishga tushirilgandan so‘ng bu ko‘rsatkichni 65 milliard kub metrgacha oshirish rejalashtirilgan. Shu yilning mart oyida Prezident Serdar Berdimuhamedov “Turkmengaz” davlat konserniga “Galkinish” konini o‘zlashtirishning to‘rtinchi bosqichi doirasida yiliga 10 milliard kub metr gaz tayyorlaydigan qurilmani barpo etish bo‘yicha Xitoyning “CNPC Amudarya Petroleum Company Ltd.” kompaniyasi bilan shartnoma imzolashga ruxsat beruvchi Qarorni imzoladi.