Hytaýyň Sinopec milli nebit kompaniýasynyň düzümine girýän kärhanalaryň biri Türkmenistanda öz wekilhanasyny açmagy we iberilen enjamlara tehniki hyzmat etmek üçin ýöriteleşdirilen merkezi döretmegi meýilleşdirýär. Bu barada kompaniýanyň wekili Aşgabatda geçirilýän «Türkmenistanyň nebiti we gazy — OGT 2026» atly XXXI halkara sergisiniň çäklerinde beren interwýusynda mälim etdi.

Kärhana nebitgaz pudagynda ulanylýan dürli görnüşli enjamlary, şol sanda burawlaýyş desgalaryny we uglewodorod serişdelerini çykarmak üçin niýetlenen tehniki enjamlary öndürmekde ýöriteleşýär. Kompaniýanyň wekili kärhananyň önümçilik kuwwaty barada maglumat berip, onuň ýyllyk dolanyşygynyň 100 burawlaýyş desgasynyň bahasyna deňdigini belledi.

Kompaniýanyň önümleriniň hataryna guýulary düýpli abatlamak, gatlaklarda gidrawliki ýarylma işlerini geçirmek, koltýubing tehnologiýasyny ulanmak we guýulary ýapmazdan abatlamak üçin niýetlenen enjamlar hem girýär. Bu tehnologiýalar nebitgaz guýularynda geçirilýän işleriň netijeliligini ýokarlandyrmaga gönükdirilendir.

Kärhana Türkmenistana öz önümlerini iberip başlamagyna 1998-nji ýyldan bäri dowam edip gelýär. Şu döwürde ýurda dürli görnüşli enjamlaryň 300 toplumy eltilip berildi. Kompaniýanyň wekili «Türkmennebit» we «Türkmengaz» döwlet konsernleri, şeýle hem «Türkmengeologiýa» döwlet korporasiýasy bilen hyzmatdaşlygyň ýola goýlandygyny nygtady.

«Türkmenistanyň nebiti we gazy — OGT 2026» halkara sergisine gatnaşmak kompaniýa üçin bar bolan işewürlik gatnaşyklaryny ösdürmäge, hyzmatdaşlygy has-da pugtalandyrmaga we täze hyzmatdaşlary tapmaga mümkinçilik döredýär.

Türkmenistanda wekilhananyň hem-de hyzmat merkeziniň açylmagy baradaky meýilnama daşary ýurtlarda öndürilen nebitgaz enjamlaryna tehniki hyzmatyň elýeterliligini ýokarlandyrmaga we bu ugurda hyzmatdaşlygyň gerimini giňeltmäge gönükdirilendir.