Türkmenistan Duşenbede geçirilen ykdysady foruma gatnaşdy

Geçen hepde Duşenbe şäherinde Merkezi Aziýa halkara ykdysady forumy (MAHYF — 2025) geçirildi. «Sebitleriň ynam, hyzmatdaşlyk we dostluk giňişligini döredýäris» atly plenar mejlise Merkezi Aziýa ýurtlarynyň we Russiýanyň hökümet edaralarynyň, işewür toparlarynyň hem-de bilermenler jemgyýetleriniň wekilleri gatnaşdy diýip, «Roskongress» gaznasy habar berýär.

Çykyş edenleriň hatarynda:

• Türkmenistanyň Maliýe we ykdysadyýet ministriniň orunbasary Babanyýaz Jalakow,

• Täjigistanyň Ykdysady ösüş we söwda ministriniň orunbasary Ahlyddin Nuriddinzoda,

• Russiýanyň Ykdysady ösüş ministriniň orunbasary Murat Kerefow,

• Russiýanyň Senagat we söwda ministrliginiň döwlet sekretary – ministriň orunbasary Roman Çekuşow,

• Russiýanyň Täjigistandaky Adatdan daşary we Doly ygtyýarly ilçisi Semýon Grigorýew,

• Özbegistanyň Maýa goýumlar, senagat we söwda ministriniň orunbasarynyň wezipesini ýerine ýetiriji Şohruh Gulamow,

• «Wildberries» kompaniýasynyň esaslandyryjysy Tatýana Kim we beýleki işewürler bar.

Mejlisiň dowamynda:

• ulag geçelgeleriniň ösdürilmegi,

• sanly platformalaryň döredilmegi,

• senagatda we oba hojalygynda innowasion tehnologiýalaryň ornaşdyrylmagy ýaly meseleler ara alnyp maslahatlaşyldy.

Gatnaşyjylar:

• sanly ykdysadyýet,

• logistika,

• senagat hyzmatdaşlygy,

• ýaşlar we bilim alyşmalary boýunça hyzmatdaşlygyň mümkinçiliklerini seljerdiler.

Plenar mejlisiň ahyrynda Bilelikdäki Jarnama gol çekildi. Bu resminamada taraplar:

• ykdysady integrasiýany mundan beýläk-de çuňlaşdyrmak,

• söwda-ykdysady gatnaşyklaryň giňeldilmegi,

• global wehimlere, şol sanda howanyň üýtgemegi we azyk howpsuzlygy bilen baglanyşykly meseleleriň bilelikde çözülmegi baradaky meýilnamalaryny tassyklaýandyklaryny nygtadylar.