Suwdan gorag mümkinçilikleri: Samsung «Galaxy A» seriýasyny täzeledi

«Samsung» kompaniýasy «Galaxy A57» we «Galaxy A37» smartfonlaryny resmi taýdan hödürledi. Täze modeller özünden öňki nesilleriň dizaýn aýratynlyklaryny saklap galsa-da, gabaranyň has ýokary hilli materiallary, täze platformalar we emeli aň (AI) funksiýalary bilen tapawutlanýarlar. Kameralar ulgamynda bolsa ujypsyzja özgerişler bar. Täze smartfonlaryň satuwy 10-njy aprelde başlanar.

«Samsung Galaxy A57» modeliniň has kämil sowadyşy üpjün etmegi üçin onuň bug kamerasynyň göwrümi 13% ulaldyldy. Smartfon metal çarçuwa we IP68 standarty boýunça suwdan hem-de tozandan goraglylyga eýe boldy («Galaxy A56» modelinde bu görkeziji IP67-di).

«Galaxy A37» modeliniň gapdal çarçuwalary plastmassadan ýasaldy. Onuň gabarasynyň galyňlygy 6,9 mm, agramy bolsa 179 grama deňdir. «Galaxy A37-niň» ölçegleri bolsa degişlilikde 7,4 mm we 196 gram bolup durýar. Kiçi modelde hem IP68 derejesindäki gorag ulgamy bar.

Modelleriň ikisi hem «Full HD+» durulygyndaky we 120 Gs täzeleniş ýygylygyndaky 6,7 dýuýmlyk «Super AMOLED» ekranlar bilen üpjün edildi. Akumulýatorlaryň göwrümi 5000 mA/sag bolup, olar 45 Wt kuwwatyndaky simli zarýad berijini goldaýarlar. Batareýanyň 60 %-ni ýarym sagadyň içinde dolduryp bilýär.

Iki smartfonyň hem esasy kamerasy 50 MP, öňdäki kamerasy bolsa 12 MP durulygyndadyr. Ultra giň burçly modullarda bolsa tapawut bar: «Galaxy A57-de» bu görkeziji 12 MP, «Galaxy A37-de» bolsa 8 MP-e deňdir. Üçünji modul hökmünde bolsa makro surata düşürmek üçin 5 megapiksellik kamera ulanylýar.

«Galaxy A57» modeli birnäçe emeli aň funksiýalaryny, şol sanda «Best Face» ulgamynyň giňeldilen mümkinçiliklerini, wideony awtomatik kesmek üçin «Auto Trim» we kämilleşdirilen «Object Eraser» wezipelerini aldy. Şeýle-de ses ýazgylaryny tekst görnüşine geçirmek funksiýasy hem elýeterlidir. Smartfonlaryň ikisi-de «Android 16» esasyndaky «One UI 8.5» programmasynda işleýär we 6 ýyllap programma üpjünçiliginiň täzelenmelerini alar.

Bahalar

Smartfonlaryň bahasy geçen ýylky modeller bilen deňeşdirilende, az-kem ýokarlandy:

«Galaxy A57» (8/128 GB) – 530 ýewro (geçen ýylky «Galaxy A56-dan» 50 ýewro ýokary).

«Galaxy A37» (6/128 GB) – 430 ýewro (geçen ýylky «Galaxy A36» modeline bolsa 380 ýewro baha kesilipdi).